Netanyahu ayaa maanta si wadajir ah ugu dhawaaqay ballaarinta howlgalkooda marinka Qasa oo uu sheegay inay dhul ballaaran ka qabsanayaan marinka , si ay usoo koobaan aaggaga ay ka howlgalli karaan Xamaas iyo in goobaha difaaca ee gudaha Qasa oo deegaan kasta la go’doominayo ay ku yeelanayaan ciidanka Israa’iil. Tallaabadan waxaa qeyb ka ah in laga hortaggo gargaaro ay ku jiraan cunada, dawada iyo shidaalka inay gaaraan goobaha la go’doomiyay, halka la joojinayo in la isugu gudbo xaafadaha Qasa oo sidoo kale la kulmaya duqeymo aan kala joogsi lahayn.
Isla Netanyahu , ayaa soo bandhigay hinside cusub oo xabbad- joojin lagu sii deynayo 11 maxbuus oo lagu beddelanayo joojinta dagaalka muddo 41 maalmood ah, sida uu ku warramay telefishinka Israa’iil ee Channel 14 .
Sida laga soo xigtay kanaalka, Telaabiib waxay aaminsan tahay in ay jirto fursad lagu heshiiyo, laakiin tani waxay u baahan doontaa in la kordhiyo cadaadiska milatari ee ka dhanka ah Xamaas, iyadoo warbixinta ay intaa ku dartay in xeeladda ciidanka Israa’iil ee Qasa ay tahay in Xamaas dhinac walba ka go’doomiyaan, isla markaana ay yareeyaan dhulka ay maamulaan, si culayska milatari ee ugu badan loo saaro.
Docda kale , wakaaladda wararka ee Reuters oo soo xiganaysa mas’uuliyiin ka tirsan Israa’iil ayaa sheegtay in ay jirto hindise xabbad-joojin ah oo muddo dheer ka soconaysa Qasa, taas oo lagu beddelayo soo celinta kala badh 24 maxbuus oo Israa’iiliyiin ah oo la rumaysan yahay inay weli nool yihiin, iyo maydadka kala badh 35 maxbuus oo la rumaysan yahay inay dhinteen, intii lagu jiray xabbad joojin socon doonta 40 ilaa 50 maalmood.
Ku dhawaaqista ayaa ku soo beegmaysa iyadoo tirada dhimashada ee duqeymaha aan kala joogsiga lahayn ee Israa’iil ay ku hayso Qasa ay kor u kacday ugu yaraan 71 dhimashada ah tan iyo waaberigii maanta. In ka badan 1,100 Falastiiniyiin ah ayaa la dilay tan iyo markii Israa’iil ay jebisay xabbad joojinta bishii hore, sida u sheegay telefishinka Al Jazeera.
Ururka Xamaas , ayaa warsaxaafadeed uu maanya baahiyay , waxaa looga dalbaday dhexdhexaadiyayaasha iyo bulshada caalamka inay ku cadaadiyaan Israa’iil joojinta xasuuqa iyo go’doominta dadka Qasa.