Xisbiga midigta fog ee Reform UK, Oo Guulo weyn ka Gaadhay Doorashooyinkii Degmooyinka Ee shalay ka Dhacday

Xisbiga midigta fog ee Reform UK, oo uu hoggaamiyo Nigel Farage, ayaa guulo weyn ka gaadhay doorashooyinkii degmooyinka iyo gollaha degaanada ee shalay ka dhacday dalka Ingiriiska. Waxa ay sidoo ku guuleysteen kursiga baarlamaanka ee Runcorn and Helsby iyaga oo helay guul cidhiidhi ah – kaliya 6 cod ayay kaga badiyeen xisbiga Labour, kaasoo kursigaasi hore ugu lahaa aqlabiyad ku dhow 15,000.

Nigel Farage ayaa sheegay in tani u tahay caddayn in xisbigiisu yahay mucaaradka dhabta ah ee cusub, isaga oo sheegay in codbixiyayaashii Xisbiga Labour ay u wareegeen xisbiga Reform UK, halka Conservative-na uu ku tilmaamay mid wakhtigiisu “dhamaaday.”

Guushan ayaa ku soo beegmaysa xilli taageerada labada xisbi ee waaweyn ee UK – Labour iyo Conservative – ay si xowli ah hoos ugu dhacayso. Reform UK, oo markii hore ahaa Brexit Party, ayaa hadda isku diyaarinaya inay si dhab ah uga qayb qaataan doorashada guud ee la filayo 2029.