Madaxweynaha dalka Mareykanka Donald Trump, ayaa canshuur cusub oo dalalka dunidda oo dhan uu ku soo rogay, waxa ayna canshuurtan durba saameyn xooggan ku yeelatay waddamada caalamka , haba ugu horreeyaan dalalka Yurub, Aasiya iyo waqooyiga Amerika.
Dalal badan oo caalamka katirsan , ayaa si adag uga falceliyay go’aankan Madaxweyne Trump ugu soo kordhiyay canshuurta xad-dhaafka ah, waxa ayna dalalka caalamka qaarkood sheegeen in iyaguna sameyn doonaan go’aanno aargoosi ah.
Madaxweynaha golaha Midowga Yurub, Ursula von der Leyen, ayaa shaacisay in canshuurta cusub uu soo rogay Madaxweyne Donald Trump dhabar-jab xooggan ku yihiin dhaqaalaha adduunka oo markii horbaa sii xumaanayay.
Waxa ayna intaasi ku dartay Madaxweynaha golaha Midowga Yurub in cawaaqib xun ay ka dhalan doonto canshuurtan cusb ee Mareykanka kusoo rogay waddamada caalamka , gaar ahaan dalalka katirsan midowga Yurub.
“Canshuuraha uu Mareykanka soo saaray waxay dhabar jab xooggan ku yihiin dhaqaalaha adduunka. Cawaaqib xun oo saameyn ku leh malaayiin adduunka ku nool ayay sidoo kale dhalin doontaa” ayey tiri Ursula von der Leyen.
Madaxweynaha dalka Mareykanka Donald Trump, ayaa tan iyo markii uu xilka la wareegay kusoo kordhiyay canshuuro dalal badan oo caalamka katirsan, waxa ayna taasi saameyn iyo jahwareer xooggan galisay ganaciga dunidda , gaar ahaan kuwa badeecadaha u iib geeya Mareykanka.