Laacibkii hore ee da’da yar ee Koonfur Afrika Luke Fleurs, una ciyaari jiray naadiga ugu caansan dalkaas ee Kaizer Chiefs, ayaa lagu dilay magaalada Johannesburg, kaddib markii uu ka biyo diiday afduub rag hubeysan u geesan rabeen.
Ciyaaryahan Luke Fleurs 24-sano jir ahaa ayaa habeenimadii Arbacada waxaa lagu toogtay kaalin shidaal oo kuyaalla magaalada Johannesburg, waxaana ragga dilka geystay ay la dhaqaaqeen gaari uu watay ciyaaryahanka.
“Markii uu sugayay in uu u adeego nin ka shaqeeya kaalinka shidaalka , waxaa ka horyimid laba nin oo hubeysan, kuwaa oo isku dayay in ay afduubtaan, markii uu ka dhago adeegay ayeyna toogteen ” ayuu yiri afhayeenka booliska Lieutenant, Colonel Mavela Masond.
Daafaca dhexe ee Fleurs ayaa daqiiqad kasta u ciyaarayay South Africa ciyaarihii xagaaga ee Olombikada Tokyo ee 2021, isla sannadkaas ayaa loogu yeeray xulka sare ee isreebreebka koobka adduunka ee ay la ciyaareen Itoobiya, inkastoo uusan ka soo kicin kursiga keydka oo uusan ciyaarin kulankaasi.
“Waxaan ku soo toosnay warka naxdinta leh ee dhimashada Luke Fleurs . Tani waxay khasaare weyn u tahay qoyskiisa, asxaabtiisa iyo guud ahaan kubada cagta. Dhammaanteen waan ka xunnahay geerida wiilkan da’da yar,” ayuu yiri guddoomiyaha xiriirka kubbadda cagta Koonfur Afrika Danny Jordaan .
Dilkan loo geestay ciyaaryahankan caanka ka ahaa dalka Koonfur Afrika ayaa walaac iyo cabsi badan ku abuuray ciyaartoyda kale ee dalkaasi ku sugan, waxaana dalkaasi kusoo badanaya falalka ka xariira dilalka iyo afduubka loo geesto dadka caanka ah.
