Weerarkii lagu qaaday qunsuliyada Iran ee Dimishiq Isniintii ayaa laga yaabaa inuu noqdo kii ugu halista badnaa ee ka dhaca meel ka baxsan Qaza tan iyo markii uu bilowday dagaalka Xamaas iyo Israel ku dhawaad lix bilood ka hor.
Weerarkan ayaa noqonaya kii ugu dambeeyay ee is xig xigay oo dhawaanahan ay Israa’iil ka fulisay gudaha dalka Suuriya oo ay ku bartilmaameedsanaysay saraakiisha Iran iyo kooxda Xisbullah ee Lubnaan oo ay Iiraan taageerto. Ilaa hadda, weerarradu ma dhalin jawaab ka baxsan baaxadda iska horimaadyada bilaha ah ee ka socda xadka Israa’iil ay la wadaagto Lubnaan – inkastoo ay soo noqnoqdeen hanjabaado Iran iyo hoggaanka Hezbollah si ay uga jawaabaan weerarrada Israa’iil.
Xulafada gobolka ee Iran ayaa sheegay in ay iska horimaadyo la galeen Israa’iil iyaga oo ka wakiil ah Falastiiniyiinta Gaza, halkaasoo in ka badan 32,000 oo qof lagu dilay, sida ay sheegeen mas’uuliyiinta deegaanka. Tani waxay kor u qaaday sumcadooda gobolka waxayna kor u qaaday mawqifkooda siyaasadeed ee gudaha. Laakin waxay damceen inay ka fogaadaan guluf dhan walba ah oo gobolka ka dhigi laheyd mid dhinac walba ka holca.
Iran ayaa ku hanjabtay inay ka aargoosan doonto Israa’iil ka dib markii ay ku eedaysay inay ka dambaysay weerarka cirka ah oo lagu qaaday qunsuliyadda ay ku leedahay Dimishiq.
Iran ayaa balan qaaday inay jawaab adag ka bixin doonto ka dib weerarkaas
Safiirka Iran ee Dimishiq, Hossein Akbari, ayaa Israa’iil ku eedeeyay weerarradaas, isagoo xusay in dhismaha lagu beegsaday lix gantaal oo ay soo rideen diyaaradaha dagaalka ee F-35 ee Israa’iil.
Akbari waxa uu sheegay in weerarka Israa’iil uu ka soo horjeedo dhammaan shuruucda caalamiga ah “Iran-na waxa ay noqon doontaa mid go’aan ka qaadata jawaabta ay bixin doonto.
Todobo sarkaal oo ka tirsan Ilaalada Kacaanka Islaamiga ah ayaa lagu dilay weerarka, oo ay ku jiraan taliyayaasha sare ee Iran Mohammed Reza Zahedi iyo Mohammad Hadi Haji Rahimi, sida lagu sheegay bayaan kasoo baxay Iran.
“Tani waa laga yaabaa inay tahay markii ugu horreysay ee maamulka Sahyuuniyadda uu isku ogolaado inuu weeraro dhismaha rasmiga ah ee safaaradda Jamhuuriyadda Islaamiga ah ee Iran, oo uu ka dul babanayay calanka Jamhuuriyadda Islaamiga ah,” ayuu yiri.
“Iran waxa ay ilaalinaysaa xaqa ay u leedahay in ay qaado tillaabooyin isdhaafsi ah waxayna go’aamin doontaa nooca jawaab celinta iyo ciqaabta ka dhanka ah gardarrada,” afhayeenka wasaaradda arrimaha dibadda ee Iran Nasser Kanaani ayaa yiri