Maxkamadda sare ee Qaramada Midoobay ayaa go’aan horudhac ah ka soo saari doonta dacwad ka dhan ah Israa’iil oo ku saabsan waxa Koonfur Afrika iyo qaar kale oo badan ay ku sheegeen in uu yahay xasuuq ka dhacay Gaza oo go’doonsan, xukunkaas oo ah mid taariikhi ah oo si weyn looga daawado bariga dhexe iyo guud ahaan caalamka.
Maxkamadda caalamiga ah ee cadaaladda [ICJ] ayaa maanta ku amri karta Israa’iil inay joojiso dagaalka ay ku hayso Gaza ama ay fududayso gargaarka bini’aadantinimo.
Maxkamaddu, si kastaba ha ahaatee, ma soo saari doonto go’aan ku saabsan in Israa’iil ay dhab ahaantii xasuuq ka geysanayso Gaza iyo in kale.
Marxaladdan, ICJ waxay soo gudbin doontaa amarada degdegga ah ka hor inta aysan tixgelin eedeymaha ballaaran ee falalka xasuuqa ee Gaza – geeddi-socod u badan tahay inuu qaato sanado.
Kiiskaan waxaa keenay Koonfur Afrika oo sheegtay in Israa’iil ay jebisay heshiiskii Qaramada Midoobay ee Xasuuqa ee 1948-kii.
“Koonfurta Afrika uma baahna inay caddayso in Israa’iil ay geysanayso xasuuq,” ayay tiri Juliette McIntyre, oo ah khabiir sharci caalami ah oo ka tirsan Jaamacadda Koonfurta Australia.
“Waxay si fudud u baahan yihiin inay caddeeyaan inay jirto khatar macquul ah oo ah inuu dhaco xasuuq,” ayay u sheegtay wakaaladda wararka ee AFP.