Hindiya ayaa walaac ka muujisay “tirada badan ee khasaaraha rayidka ah” ee ka dhashay weerarrada Israa’iil ee Lubnaan.

Afhayeen u hadlay wasaaradda arrimaha dibadda Hindiya oo lagu magacaabo Randhir Jaiswal ayaa sheegay in xaaladda hadda taagan ay tahay mid walaac ku haysa Hindiya ayna tahay mid aad u dhib badan, gaar ahaan maadaama Hindiya ay ciidamo ku dartay ciidamada nabad ilaalinta Qaramada Midoobay ee UNIFIL, ayna si toos ah u daneeyaan nabadda iyo xasilloonida Lubnaan.

Afhayeenku waxa uu intaa ku daray in Hindiya ay si dhow ula socoto xaaladda ka socota Lubnaan, isla markaana ahmiyadda ugu weyn ee waddanku ay tahay badqabka muwaadiniinteeda halkaas ku sugan.

Afhayeen u hadlay Wasaaradda Arrimaha Dibadda ayaa sheegay in Hindiya ay rabto nabad iyo xasillooni ka dhalata Lubnaan ayna la xiriirto beesha caalamka ujeeddadaas.

Ra’iisal-wasaaraha Israa’iil Benjamin Netanyahu ayaa mar dhawayd soo saaray amar ah in dalka Israa’iil laga eryo diblomaasiyiinta iyo wakiilada dalka Spain ee fadhigoodu yahay Israa’iil.

Fariin qoraal ah iyo muuqaal uu baahiyey Ra’iisal-wasaaraha Israa’iil ayuu ku sheegay in Spain ay dalkiisa kula jirto dagaal diblomaasiyadeed, sidoo kalena waxa uu xusay in Spain ay sumcad-dil ku hayso ciidamada Israa’iil ee dagaalka ku jira, waxaanu xusay in Ciidamada Israa’iil ay yihiin kuwa ugu qiyamka, akhlaada iyo damiirka fiican dunida oo dhan, sidaas darteedna aanay ogolaan doonin in la eedeeyo ciidamadiisa.

“Dal kasta oo dunida ah oo nagu soo qaada dagaal diblomaasiyadeed wixii hadda ka dambeeya ka aamusi mayno, waxayna la kulmi doonaan cawaaqib xumo aanay mahadin doonin,” ayuu yidhi Ra’iisal-wasaaraha Israa’iil.

Dowlada Faransiiska ayaa xaqiijisey geerida afar qof oo tahriibayaal ah kuwaasi oo ku sugnaa xeebta Magaalada Calais, oo ay doonni ka raacayayeen iyagoo u socday dhinaca Ingiriiska.

Dadka geeriyoodey oo kala ahaa laba nin iyo laba dumar ah ayay qaadeen mowjado iyo hirarka badda ka hor inta aanay fuulin doonta, iyadoo la badbaadiyey 38 qof oo kale, sida uu xaqiijiyay sarkaal ku sugan Magaalada Calais ee waqooyiga Faransiiska.

Dadka isku dayaya iney Faransiiska uga gudbaan dhinaca Ingiriiska iyagoo Maraya kanaalka u dhexeeya labada dal, ayaa kordhay bilihii ugu danbeeyay iyadoo todobaadkii hore lagu badbaadiyay laba hawgal in ka badan boqol qof, halka ay laba qof oo kale ku geeriyoodeen.

Wasiirka arrimaha dibadda ee ISR, ayaa qoraal dheer oo cabasho iyo eedeyn iskugu jira kasoo saarray hoggaminta dalka Spain.

Wuxuu sheegay in eedaymo aan jirn markasta Spain u jeediso ISR, isagoo xusay in ciidankoda iyo Dowlada ay magac bi’in ku hayaan. Spain, wuxuu ku tilmaamay dal ku hawlan in ay dhawaacan, oo ay ka hor keenan ururada caalamiga ah- si gaar ah in cunaqabatayn middawga Yurub ku soo rogo dal ka shaqeynaya. ISR, waxay sheegtay in Dagaalki !ran dannahoda ay toos uga hortimid.

“Spain, waxay ku hawlan tahay fidinta warar aan sal lahayn. Waxay toos uga hor timid dannaheena, siddaas darteed waxaan maanta go’aaminay in laga saaro heshiiska CMCC.” Ayaa lagu yidhi qoraalka.

CMCC- waa qorshe sannadkii 2025 la yagleelay oo Maraykanku horkacayo. Waxay ujeedadiisu tahay in nabadaynta Q*sa lagu taabo-galiyo. Qorshahan oo dalal Spain kamid tahay ka qayb-qaatan ayaa lagu sheega mid gargaarka marinka lagu fudaydiyo. Laakin, waa un qorshe ISR, oo Maraykanka kaashanaysa dannaheeda fuliya, kaas oo aysan saameyn ku yeellan karin cid doonnaysa in gargaar ama hawlo kale gaadhsiiso Flstiin. In Spain, laga saarana macne badan ma yeellan karto.

Madaxweyne ku-xigeenka Maraykanka JD Vance oo saarnaa diyaaradda Air Force Two ka hor wada-hadallada u dhexeeya wafdiyada Maraykanka iyo Iiraan ee ka dhacaya Pakistan ayaa ka hadlay rejada wdahadalada.

“Waxaan rajaynaynaa wada-hadallada,” ayuu yiri ka hor inta uusan diyaaradda fuulin, isagoo intaas ku daray in Maraykanku diyaar u yahay inuu “gacan furan fidiyo” haddii Iiraaniyiintu si “daacad ah” u dhaqmaan. Si kastaba ha ahaatee, wuxuu sheegay in haddii ay “isku dayaan inay na khiyaaneeyaan,” Maraykanku aanu diyaar u noqon doonin wada-shaqayn.

Madaxweynaha Maraykanka ayaa siiyey tilmaamo hagaya wada-hadallada, ayuu sheegay.

Wada-hadallada ayaa ka dhici doona Islamabad, Pakistan, waxaana la filayaa inay bilaabmaan Sabtida, sida ay hore u shaacisay afhayeenka Aqalka Cad Karoline Leavitt.

JD Vance waxaa la socda ergayga gaarka ah Steve Witkoff iyo Jared Kushner, balse Islamabad ayaa weli sugaysa imaanshaha wafdiga Iiraan, sida uu weriyahayaga Pakistan ku sugan sheegay.

Ruushka iyo Ukraine ayaa gaaray heshiis xabbad-joojin 32 saacadood ah , oo la xiriirta munasabadda ciidda Ortodoks-ka ee Easter-ka, taasoo billaabaysa Sabtida berri , sida uu ku dhawaaqay Putin.

Dhankiisa, madaxweynaha Ukraine Volodymyr Zelenskyy ayaa sheegay in dalkiisu diyaar u yahay inuu ixtiraamo xabbad-joojinta, haddii Ruushkuna uu sidaas oo kale sameeyo.

Soomaaliya iyo Turkiga ayaa maanta si rasmi ah u daah-furaya Hawlgalka Qodista shidaalka ku jira xeebaha Soomaaliya, kaddib markii uu magaalada Muqdisho soo gaaray Markabka Çağrı Bey.

Wasiirka Batroolka iyo Macdanta ee Dowladda Federaalka Soomaaliya, Daahir Shire, ayaa magaalada Muqdisho ku soo dhaweeyay wafdi uu hoggaaminayo Wasiirka Tamarta iyo Kheyraadka Dabiiciga ee Turkiga, Alparslan Bayraktar.

Wafdigan ayaa u yimid ka qeybgalka munaasabad lagu soo dhoweynayo markabka qodista shidaalka ee Çağrı Bey, kaas oo shalay ku soo xirtay Dekedda Muqdisho, isla markaana la filayo inuu si rasmi ah u bilaabo hawlaha baarista iyo qodista shidaalka Soomaaliya.

Munaasabadda oo lagu wado inay ka dhacdo dekedda ayaa waxaa ka qeyb geli doona Madaxweynaha Jamhuuriyadda Federaalka Soomaaliya, Xasan Sheekh Maxamuud, mas’uuliyiin ka socota dowladda Turkiga iyo madax ka tirsan hay’adaha kala duwan ee dowladda.

Hawlgalka markabka Çağrı Bey ayaa loo arkaa tallaabo muhiim ah oo horudhac u noqon karta dadaallada Soomaaliya ee ku aaddan ka faa’iidaysiga kheyraadkeeda dabiiciga ah, iyadoo la filayo inuu saameyn ku yeesho sida ay dowladdu sheegtay horumarka dhaqaale iyo mustaqbalka dalka.

Türkiye, ayaa la leh Soomaaliya iskaashi xooggan oo ay ka mid yihiin tamarta, difaaca iyo maalgashiga kaabeyaasha dhaqaalaha. Labada dowladood ayaa sanadihii u dambeeyay kala saxiixday heshiisyo is-afgarad oo dhowr ah oo ku saabsan iskaashiga.

Dalka Jabuuti waxa maanta oo Jimce ah looga dareeray Doorashada Madaxtinimo ee sanadkan 2026-ka.

Doorashadan ayaa waxa ku loolamaya labba Musharax, waxaana ugu cadcad Madaxweyne Ismaacil Cumar Geelle.

Madaxweynaha Jamhuuriyada Jabuuti Ismaacil Cumar Geelle oo ay wehelinayso Marwada Qaranka Jabuuti Marwo Khadra Maxamuud Xayd ayaa codkooda dhiibtay.

Ismaacil ayaa Jabuuti soo xukumayay tan iyo 1999-kii. Goobaha codaynta ayaa galabta soo xidhmi doona.

Si Live ah ayaanu idinku soo gudbin doona wararkii ugu danbeeyay ee doorashada Madaxtinimo ee Jabuuti iyo Natiijada hordhaca ah ee Wasiirka Arrimaha guduhu shaacin doono Ilaa natiijada rasmiga ah.