Soomaaliya, Itoobiya, Jabuuti iyo Yemen ayaa magaalada Nairobi ku yeeshay shir laba maalmood socday oo looga hadlay xoojinta iskaashiga amniga badda iyo sidii si wadajir ah wax looga qaban lahaa khataraha ka jira Badda Cas iyo Gacanka Cadmeed.
Shirka ayaa si gaar ah diiradda loogu saaray burcad-badeednimada, tahriibinta dadka iyo dambiyada abaabulan ee ka dhaca marin-biyoodka gobolka.
Dalalka ka qeybgalay ayaa isku raacay in la xoojiyo wadaagga xogta amniga iyo sirdoonka, isla markaana la abuuro xiriir toos ah oo u dhexeeya hay’adaha sharci-fulinta iyo ciidamada ilaalada xeebaha, si khataraha loo ogaado loogana hortago ka hor inta aysan saameyn ku yeelan maraakiibta iyo ganacsiga caalamiga ah.
Shirka waxaa fududeysay Hay’adda Qaramada Midoobay u qaabilsan Daroogada iyo Dambiyada (UNODC), waxaana taageeray Midowga Yurub, INTERPOL, Hay’adda Badaha Caalamiga ah (IMO) iyo IGAD, Si kastaba, heshiiska ka soo baxay kulanka ayaa hadda ah is-afgarad heer hawleed ah, mana jirto weli faahfaahin rasmi ah oo ku saabsan heshiis sharciyeed oo buuxa, xarun mideysa xog-wadaagga, miisaaniyadda ama jadwal cad oo lagu dhaqan-gelinayo qorshayaasha la isku raacay.
