Sunday, November 22, 2026

“Somaliland waxay ka Tirsan tahay Somaliya..”Mareykanka Oo Shuruudaha Amni ee Somalia ku Dabaqay Somaliland

by Heemaaln
4 minutes read
A+A-
Reset

Wasaaradda Arrimaha Dibadda ee Mareykanka ayaa mar kale caddeysay mowqifka dowladda Washington ee ku aaddan midnimada iyo madax-bannaanida Soomaaliya, iyadoo sheegtay in Somaliland ay qayb ka tahay Jamhuuriyadda Federaalka Soomaaliya, isla markaana safarrada mas’uuliyiinta Mareykanka ee halkaas ku tagaan lagu dabaqo shuruudaha amni ee ay dowladda Mareykanku u dejisay Soomaaliya inteeda kale.

Arrintan ayaa lagu xusay warbixin ay Wasaaradda Arrimaha Dibadda Mareykanku u gudbisay Koongareeska Mareykanka, taas oo cinwaankeedu yahay Potential Areas for Improved United States Engagement with Somaliland, laguna eegayay fursadaha lagu ballaarin karo xiriirka iyo iskaashiga Mareykanka iyo Somaliland.

Warbixinta ayaa si cad u sheegtay in Mareykanku aqoonsan yahay madaxbannaanida iyo wadajirka dhuleed ee Jamhuuriyadda Federaalka Soomaaliya, oo ay ku jirto gobolka Somaliland.

Qodobkan ayaa muhiimad gaar ah u leh siyaasadda Soomaaliya, maadaama uu muujinayo in Washington, inkastoo ay xiriir toos ah iyo wadahadallo la leedahay maamulka Hargeysa, haddana ay siyaasaddeeda rasmiga ah ku saleyneyso aqoonsiga midnimada dhuleed ee Soomaaliya.

Mid ka mid ah qodobada xusidda mudan ee warbixinta ayaa ah in safarrada ay mas’uuliyiinta dowladda Mareykanku ku tagaan Somaliland lagu dabaqo isla shuruudaha amni ee ka jira Soomaaliya inteeda kale.

Wasaaradda Arrimaha Dibadda Mareykanka ayaa sheegtay in arrintani ay khasab ka dhigeyso isticmaalka diyaarado aan ahayn kuwa ganacsiga caadiga ah iyo tallaabooyin kale oo amni oo u baahan kharash iyo agab badan.

Safarradaas waxaa sidoo kale isku dubbarida Safaaradda Mareykanka ee Muqdisho iyo Taliska Ciidamada Mareykanka ee Afrika (AFRICOM), si looga faa’iideysto awoodaha iyo agabka milatari ee la heli karo.

Warbixintu waxay intaas ku dartay in Safaaradda Mareykanka ee Muqdisho ay booqashooyin joogto ah oo xilliyo kala duwan ah ku tagto Somaliland, si ay ugala hadasho maamulka Hargeysa arrimo ay ka mid yihiin amniga, gargaarka bani’aadannimada iyo dhaqaalaha.

Inkasta oo Mareykanku xaqiijiyey in Somaliland ay qayb ka tahay Soomaaliya, haddana warbixintu waxay muujisay in Washington ay dan gaar ah ka leedahay goobta istiraatiijiga ah ee Somaliland ku taallo, gaar ahaan marka la eego amniga Badda Cas, Gacanka Cadmeed iyo marin-biyoodka Baabul-Mandab.

Warbixinta ayaa tilmaamtay in goobta juqraafiyeed ee Somaliland ay siin karto fursado iskaashi oo ku saabsan ilaalinta isu-socodka maraakiibta ganacsiga iyo kuwa milatariga ee isku xira Badda Cas iyo Badweynta Hindiya.

Sidoo kale, Mareykanka ayaa daneynaya in la iska kaashado la socodka iyo ka hortagga kooxaha xagjirka ah ee gobolka, gaar ahaan xiriirrada suuragalka ah ee Xuutiyiinta Yemen iyo Al-Shabaab.

Taliska Ciidamada Mareykanka ee Afrika (AFRICOM) ayaa warbixinta lagu sheegay inuu xiriir joogto ah la leeyahay maamulka Somaliland, isla markaana uu sahaminayo fursado iskaashi oo mustaqbalka la ballaarin karo.

Warbixintu waxay sidoo kale si gaar ah u xustay dekedda iyo garoonka diyaaradaha Berbera, iyadoo sheegtay inay noqon karaan xarumo muhiim u ah ganacsiga iyo isu-socodka badeecadaha gobolka.

Mareykanka ayaa sheegay in maamulka Somaliland uu dhiirrigelinayo maalgashiga shirkadaha Mareykanka, gaar ahaan dhinacyada macdanta, kaabayaasha dhaqaalaha, ganacsiga iyo horumarinta dhaqaalaha.

Dekedda Berbera ayaa muhiimad juqraafiyeed leh, maadaama ay ku taallo meel u dhow marinnada ganacsiga caalamiga ah, isla markaana ay fursad u tahay dalalka aan badaha lahayn sida Itoobiya.

Si kastaba ha ahaatee, warbixinta Mareykanka waxay tilmaantay in khilaafka siyaasadeed ee ku saabsan maqaamka Somaliland, xaaladaha amni ee gobolka iyo wada-shaqeyn la’aanta maamulka Somaliland iyo hay’adaha qaranka Soomaaliya ay caqabado ku yihiin maalgashiga, bangiyada iyo ganacsiga.

Qodobka ugu muhiimsan ee warbixintan laga dheehan karo ayaa ah in Mareykanku kala saarayo xiriirka shaqo iyo iskaashi ee uu la leeyahay maamulka Somaliland iyo mowqifkiisa ku saabsan aqoonsiga dowladnimada.

Washington waxay diyaar u tahay inay Hargeysa kala shaqeyso arrimaha amniga, ganacsiga iyo gargaarka bani’aadannimada, balse waxay caddeysay in xiriirkaasi ku dhex jiro siyaasaddeeda aqoonsiga madaxbannaanida iyo wadajirka dhuleed ee Soomaaliya.

Taasi waxay ka dhigan tahay in wadahadallada Mareykanka iyo maamulka Somaliland aysan iyaga keliya ka dhignayn in Mareykanku aqoonsaday Somaliland dal madax-bannaan.

Warbixintan waxay Dowladda Federaalka Soomaaliya u leedahay muhiimad diblomaasiyadeed, maadaama Mareykanku si qoraal ah ugu xaqiijiyey Koongareeska in Somaliland ay qayb ka tahay Soomaaliya.

Waxay sidoo kale muujineysaa in Mareykanku doonayo inuu ilaashado xiriirka uu la leeyahay maamulka Hargeysa, isaga oo aan ka tanaasulin mowqifkiisa rasmiga ah ee ku saabsan midnimada Soomaaliya.

Dowladda Federaalka Soomaaliya waxaa horyaalla fursad ay ku xoojin karto diblomaasiyaddeeda, iyadoo Washington kala shaqeyn karta arrimaha amniga, ilaalinta marin-biyoodka gobolka, la dagaallanka argagixisada iyo iskaashiga dhaqaale.

Waxaa sidoo kale muhiim ah in dowladda Soomaaliya ay ka shaqeyso sidii iskaashiga amni ee shisheeye ee ka dhacaya dhulka dalka uu ula jaanqaadi lahaa madax-bannaanida iyo shuruucda qaranka.

Warbixinta Wasaaradda Arrimaha Dibadda Mareykanka waxay mar kale muujineysaa in Washington ay Somaliland u aragto goob muhiim u ah danaha amni iyo dhaqaale ee Mareykanka, gaar ahaan gobolka Badda Cas iyo Geeska Afrika.

Hase yeeshee, farriinta siyaasadeed ee ugu weyn ayaa ah in Mareykanku weli aqoonsan yahay madax-bannaanida iyo wadajirka dhuleed ee Soomaaliya, isla markaana Somaliland ku darayo xuduudaha Jamhuuriyadda Federaalka Soomaaliya.

Sidaas darteed, inkasta oo Mareykanku ballaarinayo xiriirka uu la leeyahay maamulka Hargeysa, haddana warbixintiisu ma muujineyso inuu beddelay mowqifkiisa rasmiga ah ee aqoonsiga Soomaaliya.