Xildhibaannada Dimuqraaddiyiinta ee Golaha Senate-ka Maraykanka ayaa soo bandhigi doona sharci lagu joojinayo canshuuraha (tariffs) uu soo jeediyay Madaxweyne Donald Trump ee lagu saarayo dalalka Yurub, xilli ay jiraan xiisado la xiriira suurtagalnimada Maraykanku uu iibsado Greenland, sida uu Sabtidii sheegay hoggaamiyaha aqlabiyadda Senate-ka, Chuck Schumer.
“Canshuuraha nacasnimada ah ee Donald Trump ayaa horey u kordhiyay qiimaha alaabada isla markaana waxyeello u geystay dhaqaalaha, haddana wuxuu xaaladda uga sii darayaa. Waa wax lala yaabo inuu rabo inuu ku sii adkaysto khaladkan isagoo canshuuro saaraya xulafadeenna ugu dhow, sababo la xiriira hammigiisa aan macquulka ahayn ee ah inuu la wareego Greenland,” ayuu ku yiri bayaan.
Wuxuu carrabka ku adkeeyay in Dimuqraaddiyiintu diyaarinayaan tallaabo sharciyeed lagu hor istaagayo canshuurahaas ka hor inta aysan gaarsiin “waxyeello dheeraad ah” dhaqaalaha Maraykanka iyo xulafada Yurub.
Trump ayaa sheegay inuu saari doono canshuur dhan 10% alaabaha ka yimaada dalalka xubnaha ka ah NATO, gaar ahaan Denmark, Norway, Sweden, France, Germany, UK, Netherlands, iyo Finland, sabab la xiriirta joogitaankooda milatari ee Greenland.
Wuxuu intaas ku daray in canshuurahaasi ay gaari doonaan 25% bisha Juun haddii Maraykanku uusan awoodin inuu iibsado dhulka is-maamula ee Greenland, isagoo ku dooday in xakameynta Maraykanku ay lagama maarmaan u tahay ka hortagga khataro iman kara oo ka imanaya Shiinaha iyo Ruushka.
Madaxweynaha Faransiiska Emmanuel Macron iyo Ra’iisul Wasaaraha UK Keir Starmer ayaa dhaleeceeyay hanjabaadahaas, iyadoo Macron uu sheegay in Yurub ay ka jawaabi doonto “si mideysan oo isku dubbaridan” haddii tallaabooyinkaas la hirgeliyo.