Halkaas ayuu kaga hadlay xaaladda kacsan ee u dhexeysa Mareykanka iyo dalal badan oo Yurub ah, kuwaas oo Donald Trump uu doonayo inuu kusoo rogo canshuuro, si uu cadaadis ugu saaro, uguna xaqiijiyo iibsashada Greenland.
Isniintii ayaa la shaaciyay in Trump uu farriin cusub u diray Støre dhammaadka usbuuca. Farriintaas ayuu Trump ku sheegay inuusan mar dambe isku arkin inuu ku qasban yahay inuu ka fikiro oo keliya nabadda, maadaama uusan helin Abaalmarinta Nabadda ee Nobel. Trump wuxuu mar kale ku celiyay rabitaankiisa ah inuu iibsado Greenland, wuxuuna soo jeediyay in NATO uu ku leedahay “deyn” ama waajib uu ku mutaystay, maadaama uu isagu ka qayb qaatay xoojinta isbahaysiga.
– Waa arrin cusub in dal ka tirsan NATO uu sheegto dhul ay leedahay dal kale oo isla isbahaysiga ka tirsan. Taasi horay uma dhicin. Xitaa ma uusan meesha ka saarin in xoog la adeegsado si arrintaasi u hirgasho, ayuu yiri Støre.
– In madaxweynaha Mareykanka uu ku soo rogo canshuur ciqaabeed. Ma aha sababo dhaqaale ama khasaare ganacsi darteed, balse waa qalab siyaasadeed oo lagula beegsanayo toddoba dal oo ciidamadooda u diray Greenland, taasoo ka mid ahayd shaqada NATO ee amniga Arctic-ga, si loo qorsheeyo sida aan wadajir ugu shaqeyn karno sugidda amniga Arctic-ga, ayuu yiri Støre, isagoo intaa ku daray:
– Waxay ahaayeen laba kornayl oo ka socday taliska hawlgalka wadajirka ah ee Bodø kuwaas oo halkaas u tegay iyagoo la socda asxaab kale si ay u sameeyaan qorsheyn. Arrintaas ayuu Donald Trump ku tilmaamay wax khatar ku ah nabadda adduunka.
Trump wuxuu ku dhawaaqay inuu 1-da Febraayo ku soo rogi doono 10 boqolkiiba canshuur siddeed dal, halka 25 boqolkiiba la qorsheeyay xagaaga. Dalalkaasi waa: Denmark, Finland, Faransiis, Jarmal, Netherlands, Norway, Sweden iyo Boqortooyada Midowday (UK).
– Mar kale ayaan ku celinayaa, tani waa wax aan la aqbali karin. Waa inaan si cad uga hadalnaa oo uga hor nimaadnaa, ayuu yiri Støre.