Wararka ka imanaya xeebaha Soomaaliya ayaa muujinaya tallaabo cusub oo la xiriirta xoojinta madaxbannaanida badda, kadib markii laba ka mid ah maraakiibta dagaalka ee Turkey lagu kala magacaabo TCG Gaziantep iyo TCG Yüzbaşı Güngör Durmuş ay si rasmi ah u xirteen calanka Soomaaliya.
Arrintan ayaa timid kadib amar kasoo baxay Wasaaradda Dekedaha iyo Gaadiidka Badda Soomaaliya oo ku saabsan in maraakiibta ku sugan biyaha dalka ay muujiyaan calanka qaranka.
Sawirro laga soo qaaday dhoollatus ay sameynayeen ciidamada badda Turkiga ayaa si cad u muujinaya labada calan – kan Turkiga iyo kan Soomaaliya – oo si wadajir ah uga babanaya maraakiibtaas. Tani waxay astaan u tahay ixtiraam buuxa oo ay Ankara u muujisay shuruucda iyo amarrada ka jira biyaha Soomaaliya, waxayna sidoo kale ka tarjumaysaa xiriirka dhow ee ka dhexeeya labada dal.
Turkey ayaa muddooyinkii dambe si weyn uga dhex muuqday howlaha ka socda badda Soomaaliya, iyadoo ay ka joogaan maraakiib dagaal iyo kuwo kale oo sahamin iyo qodis shidaal wada. Intaa waxaa dheer, joogitaankaasi wuxuu salka ku hayaa heshiis iskaashi oo dhinaca amniga badda ah oo ay wada galeen Soomaaliya iyo Turkiga, kaas oo diiradda saaraya ilaalinta xeebaha, la dagaallanka burcad-badeedda, iyo ka faa’iidaysiga khayraadka badda.
Tallaabadan ah in la qaato calanka Soomaaliya marka lagu sugan yahay biyaha dalka ayaa ah mid hore loogu soo rogay dhammaan maraakiibta shisheeye ee soo gala xeebaha Soomaaliya. Dalal badan ayaa horey ugu hoggaansamay shuruucdan, iyadoo hadda Turkey ay ku biirtay liiskaas, taas oo sare u qaadaysa sharciyeynta iyo xakameynta dhaq-dhaqaaqa badda.
Guud ahaan, arrintan waxay muujinaysaa laba qodob oo muhiim ah: mid waa xoojinta awoodda dowladnimo ee Soomaaliya ee ku aaddan maamulidda biyaha dalkeeda, halka midda kalena ay tahay sii xoogeynta xiriirka istiraatiijiyadeed ee kala dhexeeya Turkiga, oo ah dal si joogto ah uga taageera Soomaaliya dhinacyada amniga, dhaqaalaha iyo horumarinta.
