Golaha Nabadda iyo Ammaanka ee Midowga Afrika ayaa soo saaray war-murtiyeed ka dib kulankoodii 1330aad ee heer wasiir, kaas oo diiradda lagu saaray xaaladda amniga Soomaaliya iyo howlgalka Taageerada iyo Xasilinta Midowga Afrika ee Soomaaliya (AUSSOM).
Goluhu wuxuu xoojiyay baahida loo qabo dardar gelinta dhismaha iyo dib-u-habeynta ciidamada amniga, iyadoo la isku darayo qorista Ciidamada Difaaca Deegaanka iyo ciidamo guur-guura, si loo qabto loona sugo deegaannada la xoreeyay, lana hirgeliyo istaraatiijiyadda nadiif ah oo hay’ad dhis ah taas oo muhiim u ah qorshaha bixitaanka ciidamada shisheeye.
Sidoo kale, golahu wuxuu carrabka ku adkeeyay muhiimadda dhismaha dowladnimada Soomaaliya iyo la dagaallanka xagjirnimada rabshadaha wata, isagoo bogaadiyay dadaallada Dowladda Federaalka ee xalinta khilaafaadka.
Goluhu wuxuu si adag u diiday faragelin kasta oo dibadeed oo lagu kala qaybinayo Soomaaliya, wuxuuna cambaareeyay fal kasta oo wax u dhimaya madaxbannaanida, midnimada iyo wadajirka dhuleed ee dalka.
Intaa waxaa dheer, Midowga Afrika wuxuu si kulul u cambaareeyay aqoonsi kasta oo hal dhinac ah oo la siiyo waxa loogu yeero “Somaliland”, wuxuuna ku baaqay in si degdeg ah looga laabto tallaabo kasta oo noocaas ah.
Ugu dambeyn, goluhu wuxuu soo dhaweeyay hadalka Guddoomiyaha Midowga Afrika ee ku aaddan taageerada joogtada ah ee nabadda iyo xasilloonida Soomaaliya.
