Warbixin kasoo baxday howlgalka ciidamada badda ee Midowga Yurub, Operation Atalanta, ayaa lagu sheegay in la helay lana go’doomiyay doon calanka Iran sidata oo ay afduubteen burcad-badeed Soomaali ah, iyadoo la rumeysan yahay in laga hortagay in loo adeegsado weerarro ka dhan ah maraakiib waaweyn.
Doonta oo lagu magacaabo Alwaseemi 786 ayaa la sheegay in la qabsaday 24-kii Maarso, xilli ay ku sugneyd qiyaastii 400 mayl-badeed oo dhanka bari kaga beegan magaalada Mogadishu. Howlgalka Atalanta ayaa hore uga digay in doontaasi loo adeegsan karo in maraakiibta ganacsiga lagu weeraro, isagoo maraakiibta kale kula taliyay inay ugu yaraan 200 mayl-badeed ka fogaadaan goobtii ugu dambeysay ee laga arkay, isla markaana ay kordhiyaan taxaddarrada la xiriira burcad-badeednimada.
Howlgalka Atalanta, oo ay ka qeyb qaataan maraakiib ka socda dalalka Midowga Yurub, ayaa sheegay inuu dib u habeeyay ciidamadiisa si ay u gaaraan goobta laga shakiyay. 27-kii Maarso ayay heleen doonta, xilligaas oo ay ku sugneyd 480 mayl-badeed dhanka koonfur-bari kaga beegan Muqdisho.
Markab dagaal oo labaad ayaa sidoo kale loo wareejiyay aagga, iyadoo la adeegsaday diyaarado si loo ururiyo xog ku saabsan xaaladda doonta kalluumeysiga.
Illaa 30-kii Maarso, doonta ayaa la go’doomiyay, balse Atalanta waxay sheegtay inay weli u socoto dhanka bari, kuna jihaysan xeebaha Soomaaliya. Howlgalka ayaa intaas ku daray inuu xiriir la leeyahay hay’adaha dowladda Soomaaliya si loo xoojiyo iskaashiga.
Mas’uuliyadda sii-deynta doonta iyo shaqaalaheeda ayaa la filayaa inay hoggaamiyaan dhinacyada Soomaaliya, maaddaama ay dhacdadu ka dhacday biyaha Soomaaliya Atalanta ayaa sheegtay inay sii wadi doonto la socodka iyo wada shaqeynta si loo aqoonsado burcad-badeedda.
