Wasiirka Arrimaha Dibadda ee Saldanadda Cumaan, Badr bin Hamad Al Busaidi, ayaa maanta ku qaabilay xarunta wasaaradda dhiggiisa Soomaaliya, Wasiirka Arrimaha Dibadda iyo Iskaashiga Caalamiga ah, Cabdisalaam Cabdi Cali, oo booqasho rasmi ah ku jooga Cumaan.
Kulanka ayaa diiradda lagu saaray xoojinta xiriirka laba geesoodka ah ee u dhexeeya labada dal iyo sidii loo horumarin lahaa iskaashiga dhinacyada kala duwan, si loo adkeeyo danaha wadajirka ah.
Sidoo kale, labada dhinac waxay ka wada hadleen xaaladaha ka taagan gobolka iyo Geeska Afrika, iyagoo adkeeyay muhiimadda ay leedahay taageeridda dadaallada lagu xaqiijinayo amniga, xasilloonida, iyo horumarka.
Wasiirka Arrimaha Dibadda ee Cumaan ayaa mar kale caddeeyay mowqifka dalkiisa ee taageerada midnimada, madaxbannaanida, iyo dhuleednimada Jamhuuriyadda Federaalka Soomaaliya, isagoo diiday aqoonsi kasta oo ka baxsan nidaamka dowladnimada Soomaaliya.
Dhankiisa, wasiirka Soomaaliya ayaa uga mahadceliyay Cumaan doorkeeda diblomaasiyadeed ee wax-ku-oolka ah iyo dadaallada ay ku taageerto nabadda, xasilloonida, iyo isu soo dhowaanshaha dhinacyada kala duwan.
Kulanka waxaa sidoo kale ka qeyb galay Safiirka Cumaan ee waaxda Carabta, Sheekh Faisal bin Omar Al Marhoon, iyo Safiirka Soomaaliya u fadhiya Cumaan, Bashiir Xasan Xaaji, iyo masuuliyiin kale oo ka socday labada dhinac.
