Wasiirka Arrimaha Dibadda ee Turkiye, Hakan Fidan, ayaa sheegay in Turkiye ay suurtagal tahay inay ku biirto howlaha miino-baarista ee laga fulinayo Marinka Hormuz, kadib heshiis nabadeed oo dhex mara Maraykanka iyo Iran.
Fidan ayaa wariyeyaasha ku sugan London u sheegay in howlaha miino-baarista ay fulin doonaan kooxo farsamo oo ka kala socda dalal kala duwan, isla markaana Turkiye aysan wax diidmo ah ka qabin ka qaybgalka hawlahaas.
Wuxuu sidoo kale ka digay in Turkiye ay dib u eegi doonto mowqifkeeda haddii ay dhacdo in isbahaysi farsamo oo dalal ah uu ku lug yeesho colaado dib u soo cusboonaada.
Fidan ayaa intaa ku daray in arrimaha la xiriira barnaamijka nukliyeerka Iran lagu xallin karo wareegga xiga ee wadahadallada oo lagu qaban doono Pakistan.
