Laba markab oo ganacsi oo wata calanka Turkiga ayaa saaka isku dhacay Badda Marmara, meel qiyaastii 33 KM koonfur kaga beegan degmada Silivri ee Istanbul, waxaana laga cabsi qabaa in mid ka mid ahi quusay.
Markabka Tuğberk İmamoğlu, oo siday 4,199 tan oo bir duuban ah, ayaa isku dhacay markabka shidaalka iyo kiimikooyinka qaada ee ALSU. Tuğberk İmamoğlu waxaa saarnaa 10 shaqaale ah, kuwaas oo dhammaantood ilaa hadda xiriirkooda la waayey.
Hay’adda Badaha Turkiga ayaa sheegtay in 3:26 aroornimo la qabtay digniin degdeg ah oo ka timid qalabka badbaadada ee markabka, halka kabtanka ALSU uu 3:41 soo sheegay inuu wax yar ka hor markab kale ku dhacay. Wicitaanno loo diray markabka iyo taleefannada shaqaalihiisa midna lagama jawaabin, taasoo keentay in masuuliyiintu rumaystaan inuu quusay.
Waxaa badda dusheeda laga helay doon iyo qalabkii badbaadada ee Tuğberk İmamoğlu, balse wax shaqaale ah lagama helin. 14 gaadiid-badeed oo gurmad ah, hal helikobtar iyo markabka ALSU ayaa hadda ka qayb qaadanaya baadi-goobka 10-ka qof.
