Madaxweynaha Somaliland Cabdiraxmaan Maxamed Cabdullaahi oo khadka fogaan aragga kula hadlay warbaahinta Reuters isagoo jooga magaalada Dubai halkaas oo uu ka qayb galayay Shir-madaxeedka Dowladdaha Adduunka, in Somaliland ay filayso in dhawaan heshiisyo waaweyn oo ganacsi ay la gasho Israel.
Madaxweynaha ayaa sharaxay khayraadka kala duwan ee Somaliland ay qanniga ku tahay sida macdanaha saliida, gaaska iyo khayraadka dihin ee badda. Waxaa kale oo u xusay madaxweynuhu in Somaliland ka shaqayn doonto sidii ay u heli lahayd tiknoolajiyada casriga ah ee Israa’iil.
Somaliland waxay leedahay kheyraad macdaneed oo ay ku jiraan keydad ballaadhan oo macdanta lithium ah, oo muhiim u ah soo saarida baytariyada iyo gawaadhida korontada ku shaqeeya.
Madaxweynuhu wuxuu sheegay inuu aad uga mahadcelinayo Israa’iil inay noqotay dawladdii u horreysay ee aqoonsata Somaliland Iyadoo Somaliland ay sidoo kale rajeyneyso iskaashi milatari oo mustaqbalka lala yeesho Israa’iil, isaga oo xusay in an wali laga wada hadlin dhismaha saldhigyo militari oo Israa’iil ay ku yeelato gudaha Somaliland.
Madaxweynaha ayaa hore u sheegay inuu aqbalay martiqaad uu ka helay Netanyahu, oo uu dhawaan booqan doono Israa’iil, laakiin weli lama cayimin taariikhda uu booqanayo.
Madaxweyne Cirro ayaa sheegay in uu filayo in dhammaan dalalka Qaramada Midoobay ay ugu dambeyntii raacaan jidka ay Israel ay qaaday.
Waxaa kale oo uu sheegay inuu xidhiidh shaqo oo wanaagsan la leeyahay Mareykanka, oo uu aaminsan yahay in Madaxweyne Donald Trump uu maalin uun aqoonsan doono Somaliland.