Ra’iisul Wasaaraha Israa’iil, Benjamin Netanyahu, ayaa faahfaahiyay shuruudaha uu u arko inay lagama maarmaan u yihiin heshiis kasta oo mustaqbalka dhex mara Mareykanka iyo Iran, isaga oo ku adkeystay in gebi ahaanba la burburiyo kaabayaasha nukliyeerka Tehran.
Hadalka Netanyahu ayaa yimid Axaddii, xilli Wasiirka Arrimaha Dibadda Iran, Cabbaas Aragchi, uu u safrayay dalka Switzerland si uu uga qeyb galo wareeg labaad oo wadahadallo nukliyeer ah oo ay la leeyihiin Mareykanka iyo Iiraan.
Isagoo ka hadlayay shir sanadle ah oo ay yeeshaan Hoggaamiyeyaasha Ururrada Yuhuudda Mareykanka, Netanyahu wuxuu sheegay inuu ka shakisan yahay in heshiis la gaari karo, balse uu usbuucii hore u sheegay Madaxweyne Donald Trump in heshiis kasta uu ku xirnaan doono dhowr qodob oo muhiim ah.
1- Waa in dhammaan walxaha la hodmiyay laga saaro Iran,” ayuu yiri.
2- waa inaanay jiri karin awood wax lagu bacramiyo ma aha oo keliya in la joojiyo habka Bacriminta, balse in la burburiyo qalabka iyo kaabayaasha suuragelinaya in wax la bacramiyo marka hore,” ayuu raaciyay.
3- waa in xal laga gaaro arrinta gantaallada ballistic-ga ah.
Netanyahu wuxuu sidoo kale ku baaqay in la sameeyo kormeer joogto ah oo dhab ah oo lagu sameeyo barnaamijka nukliyeerka Iran.
“Waa inay jiraan kormeerro dhab ah oo wax ku ool ah, aan horay loo sii ogeysiin, balse si wax ku ool ah u xaqiijinaya dhammaan arrimaha kor ku xusan,” ayuu yiri.
Iran iyo Mareykanka ayaa dib u bilaabay wadahadallada nukliyeerka bishii 6 bisha Febraayo ee sanadka dalka Cumaan, kaddib bilo ay hakad ku jireen wadahadalladii hore. Hakadkaas ayaa yimid markii Israa’iil ay billowday duqeymo aan hore loo arag oo ka dhan ah Iran bishii Juun ee la soo dhaafay, taasoo sababtay dagaal socday 12 maalmood.
Mareykanka ayaa ku biiray weerarradaas, isaga oo duqeeyay saddex goobood oo nukliyeer ah oo ku yaalla Iran.
Hadalka Netanyahu ayaa ah markii ugu horreysay ee uu si fagaare ah uga hadlo wada-hadalladii uu la yeeshay Trump ee ka dhacay Washington, Arbacadii la soo dhaafay. Kulankaas wuxuu ahaa kii toddobaad ee ay yeeshaan tan iyo markii Trump dib ugu soo laabtay xafiiska sanadkii hore.