Donald Trump ayaa soo jeediyay in dagaalka ka dhanka ah Iiraan laga yaabo inuu dhawaan dhammaado, isagoo u sheegay warbaahinta Maraykanka ee ay wada-shaqaynta la leedahay BBC, ee CBS News: “Waxaan u maleynayaa in dagaalku uu ku dhow yahay inuu dhammaado, si weyn ayuu u dhammaystirmay.”
Wuxuu sheegay in Maraykanku “aad uga horreeyo jadwalkii la qorsheeyay”, isagoo intaas ku daray in Iiraan “aysan lahayn ciidan badeed, isgaarsiin, ama ciidan cirka ah,” isla markaana uu ku dooday in gantaalladoodu “ay noqdeen kuwo kala firidhsan oo aan isku toosneyn.”
Markii la weydiiyay inuu u maleynayo in dagaalku dhowaan dhammaan karo, Trump wuxuu ku jawaabay: “Soo afjaridda dagaalka waxay ku jirtaa maskaxdayda.”
Trump ayaa sidoo kale sheegay inuusan “ku faraxsanayn” in Mojtaba Khamenei loo doortay hoggaamiyaha sare ee dalkaas.
“Waxaan taageeri doonaa dilka Mojtaba Khamenei haddii uusan oggolaan inuu ka tanaasulo barnaamijka nukliyeerka.”Sida uu yiri Donald Trump.
Donald Trump ayaa u sheegay jariiradda New York Post inuu “aad uga fog yahay” gaarista go’aan ku saabsan inuu ciidamo Mareykan ah u diro dalka Iiraan.
Markii la weydiiyay inuu ka fiirsanayo dirista askar gudaha dalkaas si loo xaqiijiyo badbaadada kaydka Yuraaniyamka, Trump wuxuu yiri: “Weli wax go’aan ah kama aynaan gaarin arrintaas. Aad ayaan uga fog nahay”.
Aqalka Cad ayaa hore u tilmaantay in dagaalkan, oo galay maalintiisii tobnaad, uu socon karo in ka badan hal bil.