Feeryahannadda Soomaaliyeed ee Ramla Cali ayaa guul taariikhi ah ka gaartay tartanka feerka adduunka, kaddib markii ay ku guuleysatay laba suun oo kala ah WBO iyo IBF, iyadoo guusheeda ay u hibeysay aabbaheed oo geeriyooday bishii May ee sanadkan.
Ramla Cali ayaa Axaddii 8-da November magaalada Arlington ee gobolka Texas ee dalka Mareykanka ku garaacday feeryahannadda Mareykanka ah ee Mikiah Kreps, kaddib tartan ka koobnaa 10 wareeg, kaas oo ahaa mid adag oo labada dhinacba ay muujiyeen awood iyo adkeysi.
Guushan ayaa Ramla u suuragelisay inay markii ugu horreysay ku guuleysato horyaalka feerka adduunka, iyadoo gacanta ku dhigtay suumanka ururrada WBO iyo IBF ee miisaanka Super Bantamweight. Waxay sidoo kale noqotay guul taariikhi ah oo kor u qaadday magaca Soomaaliya ee ciyaaraha caalamka.
Markii garsoorayaasha ay ku dhawaaqeen in guushu raacday Ramla, waxay jilbaha dhulka dhigtay iyadoo ilmo farxad iyo murugo isugu jira ay ka qubanayaan, maadaama ay xusuusatay aabbaheed oo ay sheegtay inuu ahaa qofkii ay sida gaarka ah u jeclaan lahayd inuu la wadaago farxadda guusheeda.
Wareysi gaar ah oo ay siisay BBC ayay Ramla ku sheegtay in geerida aabbaheed ay saameyn weyn ku yeelatay, balse xusuustiisa iyo dhiirrigelintii ay ka heshay qoyskeeda ay ka caawiyeen inay sii waddo tartanka, xitaa xilliyadii ay dareemaysay daal aad u daran.
Waxay sheegtay in sannado badan oo shaqo adag, tababar iyo naf-hurnimo ah ay ku soo urureen daqiiqaddii magaceeda lagu dhawaaqay, iyadoo tilmaantay inay wax badan ka tanaasushay nolosheeda caadiga ah si ay u gaarto himiladeeda ciyaareed.
Geerida aabbaheed oo qayb weyn ka qaadatay dhiirrigelinteeda
Ramla Cali ayaa sheegtay in aabbaheed uu ahaa qofka ugu weyn ee ay maskaxda ku haysay habeenkii ay ku tartamaysay horyaalka adduunka, iyadoo xusuustiisu ay siisay awood ay kaga gudubto daalka iyo culayska tartanka.
Waxay sheegtay in tababaraheeda uu ka hor inta aysan garoonka gelin kula dardaarmay inay xusuusato aabbaheed, isla markaana ay guusha u dagaallanto isaga dartii.
Sidoo kale, walaalkeed oo ku sugnaa geeska goobta feerka ayaa marar badan ku dhiirrigeliyay inay guusha u keento aabbaheed, gaar ahaan markii ay dareentay daal iyo tabar-darro.
Ramla ayaa sheegtay inaysan jirin hal daqiiqo oo tartanka ka mid ah oo aysan ka fikirin aabbaheed, iyadoo xusuustiisa ay ku tilmaantay dhiirrigelintii ugu weynayd ee ka caawisay inay guusha gaarto.
Waxay sidoo kale shaacisay in saddexdii maalmood ee ka horreeyay tartanka aysan si wanaagsan u seexan, iyadoo walwal ka qabtay la kulanka Mikiah Kreps oo ay hore u wada tababaran jireen, taas oo ka dhigtay tartanka mid xambaarsan culays dhinaca maskaxda ah.
