Warbaahinta Israa’iil ayaa sheegtay in Tel Aviv ay walaac ka muujisay xiriir milatari oo sii xoogeysanaya oo u dhexeeya Masar iyo Turkiga, kaas oo la rumeysan yahay inuu horseedi karo heshiisyo amni iyo difaac oo saameyn ku yeelan kara isu-dheellitirka awoodaha Bariga Badda Mediterranean-ka.
Sida ay qortay wargeyska Israa’iiliga ah ee Maariv, hay’adaha sirdoonka Mareykanka ayaa la socday dhaqdhaqaaqyo aan caadi ahayn oo muujinaya koror ku yimid wada-shaqeynta dhinacyada difaaca iyo amniga ee Qaahira iyo Ankara. Warbixintu waxay sheegtay in Washington ay weydiisatay safaaradaheeda Turkiga iyo Masar inay soo gudbiyaan xog ku saabsan wada-hadallada amni iyo milatari ee u socda labada dal.
Ilo xog-ogaal ah ayaa tilmaamay in Mareykanka uu doonayo inuu fahmo haddii Masar iyo Turkigu ku dhow yihiin inay saxiixaan heshiisyo istiraatiiji ah oo wax ka beddeli kara xaaladda amni iyo awood qaybsiga gobolka Bariga Mediterranean-ka.
Warbixinta ayaa sidoo kale sheegtay in Israa’iil ay ka mid tahay dhinacyada ugu badan ee danaynaya faahfaahinta xiriirka cusub ee Ankara iyo Qaahira, iyadoo la sheegay inay isku dayeyso inay xog dheeraad ah ka hesho kanaallada Mareykanka.
Waxaa jira warar sheegaya in wada-hadallada ay ka mid yihiin suurtagalnimada in Masar ay hesho nidaamyo difaac cirka ah oo ay soo saarto Turkiga, inkastoo aan weli la shaacin heshiis rasmi ah.
Arrintan ayaa kusoo beegmaysa xilli Turkiga iyo Masar ay si tartiib tartiib ah u soo celinayaan xiriirkoodii diblomaasiyadeed kadib sannado badan oo xiisad siyaasadeed ah. Haddii iskaashigan amni uu sii qoto dheeraado, waxaa la filayaa inuu soo jiito dareenka quwadaha gobolka, gaar ahaan Israa’iil, Giriigga iyo Qubrus, kuwaas oo si dhow ula socda isbeddellada ka socda Bariga Mediterranean-ka
