Israel ayaa u yeeratay safiirka ka joogay Talyaaniga kadib markii wasiirka arrimaha dibadda ee Talyaaniga Antonio Tajani, uu si adag u cambaareeyay weerarrada ay Israa’iil ka geysatay magaalada Beirut.

Wasiir Tajani ayaa ku tilmaamay weerarradaasi wax aan la aqbali karin” intii uu booqasho ku joogay Beirut, isagoo xusay in ay ku dhinteen in ka badan 300 qof oo ay ku jiraan haween iyo carruur, sida ay sheegtay wasaaradda caafimaadka ee Lebanon.

Maxkamad ku taal magaalada Paris ayaa xukun ku ridday shirkadda soo saarta sibirka ee Lafarge iyo agaasimaheedii hore Bruno Lafont, ka dib markii lagu helay dambi ah inay maalgeliyeen kooxda Dac!sh intii uu socday dagaalkii sokeeye ee Suuriya.

Baaritaanka maxkamadda ayaa lagu ogaaday in shirkaddu ay bixisay lacag gaaraysa 6.5 milyan oo doolar intii u dhaxeysay 2013 ilaa 2014, si ay u dammaanad qaadato ammaanka warshadeeda ku taal waqooyiga Suuriya.

Lacagtaas ayaa la xaqiijiyay in ku dhowaad hal milyan oo doolar oo ka mid ah ay si toos ah u gashay gacanta kooxaha argagixisada.

Garsoorka ayaa ku xukumay agaasimihii hore ee shirkadda, Bruno Lafont, lix sano oo xabsi ah, halka xubno kale oo ka tirsanaa maamulka sare ee shirkadda iyagana lagu riday xukuno kala duwan.

Go’aankan ayaa muujinaya mas’uuliyadda weyn ee shirkadaha caalamiga ah ka saaran inay ka fogaadaan wax kasta oo taageero u noqon kara kooxaha hubeysan ee ka dagaalama goobaha colaadaha.

Shirkadda Lafarge ayaa noqotay mid ka mid ah shirkadihii ugu horreeyay ee weyn oo loo maxkamadeeyo dambiyo la xiriira maalgelinta argagixisada.

Ra’iisul Wasaaraha Talyaaniga, Giorgia Meloni, ayaa sheegtay in aan la aqbali-karin dhaleecaynta ee Donald Trump u jeediyay baadariga Katooliga, Pope Leo.

“Waxaan u arkaa ereyada Madaxweyne Trump ee ku aaddan baadire weynaha, kuwo aan la aqbali karin. Pope-ku waa madaxa kaniisadda Katooligga, waana mid sax ah oo munaasib ah inuu ku baaqo nabad uuna cambaareeyo dhammaan noocyada dagaalka,” ayay tiri bayaan ay soo saartay.

Hadalkan ayaa yimid ka dib markii madaxweynaha Mareykanka Trump uu hadalo dhaliila u jeediyey Pope-ka. isagoo ku eedeeyay inuu raali ka yahay iney Iiraan yeelato hub nukliyeer ah.

Trump ayaa yidhi “Ma doonayo baadari dhaliila Madaxweynaha Mareykanka, ma doonayo baadari u malaynaya iney caadi tahay in Iiraan ay yeelato hub nukliyeer ah, ma doonayo baadari u malaynaya iney wax xun tahay in Mareykanku uu weeraro Venezuela.”

La-taliye sare oo u dhow hoggaamiyaha ruuxiga ah ee Iiraan, Ali Akbar Velayati, ayaa sheegay in dalkiisu si buuxda u maamulo marinka istaraatiijiga ah ee Hormuz, isagoo carrabka ku adkeeyay in ilaalinta qaranku ay tahay tiirka ugu muhiimsan ee diblomaasiyadda Tehran.

Qoraal uu ku baahiyay baraha bulshada ayuu ku yiri furaha Hormuz wuxuu ku jiraa gacmaheenna awoodda leh, isagoo muujinaya mowqif adag xilli ay xiisaduhu sii xoogeysanayaan.

Hadalkan ayaa kusoo beegmaya kadib markii wada-hadallo dhex maray Iiraan iyo Mareykanka oo ka dhacay Islamabad ay kusoo dhammaadeen natiijo la’aan, iyadoo labada dhinac ay isku eedeeyeen fashilka heshiiska.

Iiraan ayaa la sheegay inay soo bandhigtay shuruudo ay ka mid yihiin dammaanad amni, qaadista cunaqabateynta, aqoonsiga barnaamijkeeda nukliyeerka, iyo dib u soo celinta hantida la xannibay.

Madaxwayne Trump ayaa weerar afka ku qaaday dalka Cuba oo uu ku tilmaamay dal fashilmay waxuuna yiri: “Cuba waa dal fashilmay, waxaana laga yaabaa inaan u jeesanno kadib marka aan ka dhammaano Iiraan.”

Hadda waa inaan fahanaa , sababta uu Trump ugu celceliyo Soomaaliya inay tahay dal fashilmay, ma aha wax iska caadi ah iyo dhaleeceyn wax loo arki karo, sababtoo ah waxaa suragal ah meesha xigta Cuba inay tahay Soomaaliya.

Dhanka kale warbaahinta Maraykanka ayaa su’aalo Trump ka weydiiyay suurtagalnimada wada-hadallo dambe oo dhexmara Mareykanka iyo Iran, ka dib markii ay ergooyinkoodu ku guuldareysteen inay heshiis ku gaaraan dalka Pakistan dhammaadkii toddobaadka.

“Waxay si aad u weyn u rabaan inay heshiis gaaraan.”

“Iran ma yeelan doonto hub nukliyeer ah,” ayuu yiri, waana arrinta weli ah caqabadda ugu weyn ee u dhaxaysa labada dhinac.

“Waxyaabo badan ayaan ku heshiinnay, laakiin arrintaas kuma aynan heshiin.”

Balse wuxuu sheegay in “hubaal” in Iiraayniyiintu ugu dambeyntii oggolaan doonaan. “Haddii aysan oggolaan, heshiis ma jiro,” ayuu yiri Trump.

Ra’iisul Wasaaraha Qatar ayaa wada hadal telefoon la yeeshay Wasiirka Arrimaha Dibadda ee !ran iyaga oo ka wada hadlay xaaladda xabbad-joojinta u dhaxaysa Iran iyo Maraykanka iyo saameynta ay ku yeelan karto gobolka.

Bayaan kasoo baxay Wasaaradda Arrimaha Dibadda Qatar ayaa lagu sheegay in labada mas’uul ay muujiyeen “baahida loo qabo in dhammaan dhinacyadu ka jawaabaan dadaallada dhexdhexaadinta socda,” si loo furo waddo lagu xallinayo asalka xiisadda iyada oo loo marayo wadahadal iyo xal nabadeed.

Ra’iisul Wasaaraha Qatar ayaa sidoo kale carrabka ku adkeeyay muhiimadda ay leedahay in la furo dhammaan marin-biyoodka muhiimka ah ee Hurmuz.