Booliska Pakistan ayaa muddo kooban xiray toddobo qof oo ka mid ahaa dad ka qeyb galay dibadbax ay dhigeen qoysaska 10 badmaax oo u dhashay Pakistan, kuwaas oo muddo ku dhow 140 maalmood afduub ahaan loogu haysto gacanta burcad-badeed Soomaali ah.
Badmaaxiintan ayaa ka mid ah 17 shaqaale ah oo la socday markabka shidaalka qaada ee MT Honour 25, kaas oo calanka Palau sita, waxaana burcad-badeeddu qabsadeen 21-kii Abriil xilli uu marayay meel ka baxsan xeebaha Soomaaliya, gaar ahaan agagaarka Puntland.
Qoysaska badmaaxiinta iyo taageerayaashooda ayaa habeenkii Axadda dibadbax ka dhigay bannaanka xarunta Wasaaradda Arrimaha Dibadda Pakistan ee magaalada Karachi, iyagoo dalbanayay in dowladda ay si cad uga warbixiso dadaallada lagu doonayo in lagu sii daayo xubnaha qoyskooda.
Naseem Khan, oo ah sarkaal ka tirsan saldhigga booliska Tipu Sultan, ayaa sheegay in toddobada qof la xiray kadib markii ay adeegsadeen sameecado iyaga oo aan haysan oggolaanshaha loo baahan yahay, sidoo kalena ay diideen inay kala dareeraan.
Si kastaba, booliska ayaa markii dambe sii daayay dadka la xiray, iyagoo uga digay inay mustaqbalka dibadbaxyo dhigaan iyaga oo aan marka hore helin oggolaanshaha rasmiga ah ee loo yaqaan NOC.
Ayesha Ameen, oo ah xaaska mid ka mid ah badmaaxiinta la haysto, ayaa sheegtay in dibadbaxayaashu ay si nabad ah u mudaharaadayeen, isla markaana aysan wax dhibaato ah u geysan dadka ama xarumaha dowladda.
Qoysasku waxay sidoo kale toddobaadkan dibadbax ka dhigeen deegaanka Numaish ee Karachi, iyagoo sheegay in muddo ku dhow bil iyo bar aysan wax xiriir ah la sameyn badmaaxiinta. Waxay intaas ku dareen in haddii aysan helin xog cad oo ku saabsan dadaallada lagu sii deynayo ay qaadi karaan tallaabooyin ay ka mid tahay gaajo-joojin.
Afduubka markabka Honour 25 ayaa qeyb ka ah dib-u-soo-kabashada burcad-badeednimada ee ka jirta xeebaha Soomaaliya iyo Gacanka Cadmeed, kaddib sanado ay hoos u dhac weyn ku yimid weerarrada burcad-badeedda.
Hay’adda Caalamiga ah ee Badaha, IMO, ayaa sheegtay in xaaladda amni ee gobolka ay sii xumaaneyso, iyadoo dhowr markab iyo in ka badan 90 badmaax ay gacanta ugu jiraan burcad-badeed iyo kooxo hubeysan.
Midowga Yurub, oo howlgallo ka dhan ah burcad-badeednimada ka wada Badweynta Hindiya, ayaa sheegay in markabka Honour 25 uu weli ku sugan yahay biyaha Soomaaliya, arrintaas oo xaddidaysa tallaabooyinka ay ciidamada badda ee caalamiga ah qaadi karaan.
IMO ayaa sidoo kale hore uga digtay in shaqaalaha saaran qaar ka mid ah maraakiibta la haysto, oo uu ku jiro Honour 25, ay wajahaan gabaabsi ku yimid raashinka iyo biyaha, iyadoo sidoo kale jirta cabsi laga qabo in loo geysto rabshado.
Dowladda Pakistan ayaa sheegtay inay waddo dadaallo diblomaasiyadeed iyo kuwo bani’aadannimo oo lagu doonayo in lagu sii daayo badmaaxiinta. Islamabad ayaa sidoo kale sheegtay inay xiriir la sameysay dowladda Soomaaliya iyo dhinacyada kale ee ay khuseyso arrintan.
Ra’iisul Wasaare ku-xigeenka ahna Wasiirka Arrimaha Dibadda Pakistan, Ishaq Dar, ayaa kulamo la yeeshay mas’uuliyiin ka tirsan IMO, isagoo dalbaday in si degdeg ah loo xoojiyo dadaallada lagu doonayo in badmaaxiinta loogu soo celiyo dalkooda.
Pakistan waxay sheegtay in aysan diyaar u ahayn bixinta madax-furasho, iyadoo dowladda ay ku adkeysaneyso in arrinta lagu xalliyo waddooyin diblomaasiyadeed iyo iskaashi caalami ah, halka dadaallada lagu hubinayo in badmaaxiinta helaan cunto, biyo iyo waxyaabaha kale ee aasaasiga ah ay socdaan.
