HNN: Af-hayeenka Esmaeil Baghaei ayaa shir jaraa’id oo uu qabtay Isniintii sheegay in Tehran ay leedahay dalabyo ku saleysan danaha qaranka, kuwaas oo horay loogu gudbiyay kooxda dhexdhexaadinta.
Isla markaana, wuxuu meesha ka saaray dalabyadii hore ee Maraykanka, kuwaas oo uu ku tilmaamay qaar “xad-dhaaf ah”.
“Iiraan kama labalabeyso inay si cad u muujiso waxa aan u aragno dalabyadayada sharciga ah. Tani waa inaan loo fasirin calaamad tanaasul ah, balse waa mid ka turjumaysa kalsoonida aan ku qabno difaacidda mowqifkayaga,” ayuu yiri Baghaei.
Af-hayeenka ayaa ku nuuxnuuxsaday in wadahadalladu ay yihiin “kuwo aan la jaanqaadi karin digniinaha kama dambeysta ah (ultimatum) iyo hanjabaadaha la xiriira geysashada dambiyo dagaal”.
“Waxaan diyaarsannay jawaabahayaga noo gaarka ah,” ayuu yiri isagoo ka jawaabayay su’aal uu weydiiyay suxufi Iiraani ah oo ku saabsanayd dadaallada socda ee lagu doonayo in xabbad-joojin lagu kala dhex dhigo Iiraan iyo Maraykanka.
Madaxweyne Donald Trump ayaa dib u dhigay waqtigii loogu talagalay mid ka mid ah digniinihiisii dhowrka ahaa ee uu ku dalbanayay heshiis. Haddii Iiraan ay oggolaan weydo xabbad-joojinta, Trump wuxuu ugu hanjabay inuu dalkaas u duqeyn doono sidii uu ugu celin lahaa “waagii dhagaxa.
Heemaal News Network
