Dowladda Federaalka Soomaaliya ayaa sheegtay in qaar ka mid ah xubnaha mucaaradka ay ka baxeen ajendihii lagu heshiiyay, taasoo keentay in wadahadalladii ka socday Muqdisho ay hakad galaan.
War-saxaafadeed ay dowladdu soo saartay ayay ku sheegtay in tan iyo markii la iclaamiyay gogosha wadatashiga qaran bishii Maarso 2025, ay waday kulamo ay la yeelatay madax hore, siyaasiyiin, aqoonyahanno iyo xubno ka socday bulshada rayidka ah. Ujeeddadu waxay ahayd in la helo talooyin ku saabsan dhismaha dowlad casri ah iyo dimuqraadiyad.
Dowladdu waxay sheegtay in arrimaha waaweyn ee dalka lagu xallin karo oo keliya wada-hadal iyo is-afgarad ku dhisan dastuurka iyo shuruucda dalka. Waxay kaloo sheegtay inay aqoonsan tahay doorka dhammaan dhinacyada siyaasadda, gaar ahaan marka laga hadlayo doorashooyinka iyo nidaamka federaalka.
Sida lagu sheegay war-saxaafadeedka, kulamadii hore waxaa lagu heshiiyay saddex arrimood: in la dhiso guddi ka talo bixiya doorashada federaalka, in la qabto doorashooyinka dowlad-goboleedyada, iyo in bisha Abriil 2026 la isugu yimaado kulan kale oo lagu sii wado arrimaha doorashada federaalka.
Laakiin dowladdu waxay sheegtay in maalintii koowaad ee wada-xaajoodka ay xubno ka tirsan Golaha Mustaqbalka Soomaaliyeed si lama filaan ah u keeneen qodobo cusub oo aan horey loogu heshiin. Dowladdu waxay ku tilmaantay qodobadaas kuwo aan ku dhisneyn dastuur ama sharci. Waxay sheegtay in mid ka mid ah qodobadaas uu ahaa in Golaha Mustaqbalka ay si toos ah uga talo bixiyaan maamulka doorashooyinka dowlad-goboleedyada kale.
Dowladdu waxay sheegtay inay muujisay dulqaad si ajendaha lagu heshiiyay loo ilaaliyo, balse ay ka xun tahay in Golaha Mustaqbalka ay soo saareen bayaan ay ku tilmaantay mid aan waafaqsanayn habkii iyo nuxurkii wada-hadallada.
Ugu dambayn, Dowladdu waxay ku celisay in albaabada wada-hadalku u furan yihiin cid kasta oo diyaar u ah wada-hadal ku dhisan dastuurka, isla markaana ay ka go’an tahay in la hirgeliyo hannaan doorasho oo waafaqsan dastuurka kana tarjumaya rabitaanka shacabka Soomaaliyeed.
Halkan ka akhri war saxaafadeedka
