Wasiirka Arrimaha Dibadda ee Iran, Abbas Araghchi, ayaa si kulul uga hadlay xiisadda sii kordheysa ee u dhaxeysa Tehran iyo Tel Aviv, isaga oo ku eedeeyay dowladda Israel inay si ula kac ah u hurinayso colaadda, isla markaana ay ku dadaaleyso in United States lagu jiido dagaal toos ah oo lala galo Iran.
Araghchi wuxuu sheegay in “hal maamul oo kaliya uu gobolka ka doonayo dagaal,” isaga oo ula jeeday Israel. Sida uu hadalka u dhigay, Israel kaligeed ma awooddo inay qaaddo tallaabo milatari oo waaweyn oo ka dhan ah Iran, sidaas darteedna ay isku dayeyso inay Mareykanka ku qanciso ama ku riixdo dagaal ballaaran.
Wuxuu intaas ku daray in dadaallo hore oo Israel ay sameysay si ay u wiiqdo Iran ay fashilmeen, taasoo sababtay – sida uu sheegay – inay haatan raadineyso taageero toos ah oo Mareykan ah.
Qodobka kale ee uu carrabka ku dhuftay wasiirku wuxuu ahaa in la kala saaro dowladda Israel iyo Ra’iisul Wasaaraha hadda talada haya, Benjamin Netanyahu. Araghchi wuxuu ku eedeeyay Netanyahu inuu si gaar ah u daneynayo hurinta dagaal, isla markaana uu ku riixayo hoggaanka Mareykanka, gaar ahaan madaxweynihii hore Donald Trump, inay qaadaan tallaabo milatari oo ka dhan ah Iran.
Iran waxay ku doodaysaa in dagaal noocaas ahi aanu wax dan ah ugu jirin Mareykanka, balse uu yahay mid u adeegaya ajandaha siyaasadeed ee Netanyahu.
Hadalka Araghchi wuxuu ku soo aadayaa xilli ay sare u kaceen weerarro is-daba-joog ah oo ka dhacay Bariga Dhexe, isla markaana ay sii xoogeysanayaan hanjabaadaha la xiriira barnaamijka nukliyeerka Iran, weerarrada ka dhanka ah saldhigyada Mareykanka ee gobolka, iyo dagaalka Gaza oo sii hurinaya xiisadaha.
Iran iyo Israel muddo dheer waxay ku jireen dagaal dadban (proxy war), balse khubarada amniga ayaa ka digaya in haddii Mareykanka si toos ah ugu lug yeesho, uu khilaafku isu rogi karo dagaal goboleed ballaaran oo saameeya dalal badan.
Hadalkan kasoo baxay wasiirka arrimaha dibadda Iran wu xuu muujinayaa sida ay Tehran u aragto in cadaadiska ka imanaya Israel uu yahay mid qorsheysan oo lagu doonayo in lagu kala fogeeyo Iran iyo Mareykanka, loona abuuro dagaal toos ah.
Dhanka kale, Israel iyo xulafadeeda ayaa Iran ku eedeeya inay taageerto kooxo hubeysan oo gobolka ka hawlgala, isla markaana ay khatar ku tahay amniga gobolka.
Xiisaddan sii kordheysa waxay u baahan tahay dadaallo diblomaasiyadeed oo xooggan si looga hortago dagaal ballaaran oo ka qarxa Bariga Dhexe.