Ra’iisul wasaarihii hore ee Poland,Mateusz Morawiecki ayaa u sheegay reer Yurub inay ku jiraan marxalad halis ah oo u dhaweyn karta burbur.

Mateusz ayaa soo bandhigay lix qodab oo u baahan inay wax ka badalaan midawga Yurub wuxuu yiri:

1“Afartankii sano ee la soo dhaafay, Yurub waxaa lagu dhisay shan tiir:

2•Dammaanad amni oo Mareykanku si bilaash ah ku bixiyo.

3•Iibinta badeecooyin faa’iido sare leh oo loo iib geeyo Shiinaha

4•Tamar jaban oo ka timaadda Ruushka

5•Shaqaale jaban oo ka yimaada Yurubta Dhexe

6•Maalgelin jaban oo ka timaadda Bankiga Dhexe ee Yurub

Laakiin hadda, dhammaan arrimahaas waa dhammaadeen.Midowga Yurub waa inuu dib isku qaabeeyaa haddii uu doonayo inuu sii ahaado mid tartanka ku jira.”

Madaxweynaha Maraykanka Donald Trump ayaa ku dhawaaqay in Lubnaan iyo Israa’iil ay ku heshiiyeen xabbad joojin 10 maalmood ah.

Wuxuu ku sheegay qoraalkiisa uu ku shaacinayo heshiiska xabbad-joojinta, Donald Trump inuu la hadlay Madaxweynaha Lubnaan Joseph Aoun iyo Ra’iisul Wasaaraha Israa’iil Benjamin Netanyahu.

Bayaanka qoraalka ah ee uu Trump soo saaray ayaa u dhignaa sida tan “Waxaan hadda la yeeshay wada-hadallo aad u wanaagsan oo aan la yeeshay Madaxweynaha si weyn loo ixtiraamo ee Lubnaan, Joseph Aoun, iyo Ra’iisul Wasaare Bibi Netanyahu ee Israa’iil.

Labadan hoggaamiye waxay ku heshiiyeen in si loo gaaro NABAD u dhexeysa dalalkooda, ay si rasmi ah u bilaabaan XABBAD-JOOJIN 10 maalmood ah, taas oo bilaabanaysa 5 galabnimo waqtiga EST.

Talaadadii, labada dal waxay markii ugu horreysay ku kulmeen Washington, D.C. muddo 34 sano ah, iyagoo la joogay markii ugu dambeysay.

Dhanka kale Trump ayaa amaanay Ra’iisul wasaaraha iyo Taliyaha Ciidanka Pakistan isagoo sheegay inay dad aad u wanaagsan yihiin.

“Waxay xiriir dhow la leeyihiin Iiraan, waxayna dadaal ugu jiraan sidii xal loogu heli lahaa arrintan, waxayna ku guuleysanayaan si muuqata.”

Telefishinka Al Jazeera ayaa ku warramay inay soo baxayaan calaamado muujinaya in wada-hadallada u dhexeeya Mareykanka iyo Iiraan ay ugu dambeyn u sii dhowaanayaan heshiis, iyadoo Pakistan ay door dhexdhexaadin ah ka ciyaarayso.

Mas’uuliyiinta Pakistan waxay aaminsan yihiin in ay horumar dhab ah sameeyeen, iyagoo fariimo u kala gudbinaya labada dhinac, isla markaana isku dayaya inay xalliyaan caqabadihii hore u fashiliyay wada-hadalladii ka dhacay Islamabad.

Raysal wasaaraha Itoobiya ayaa shaaca ka qaaday in Gobolka Geeska Afrika aanu heleyn nabad ilaa Itoobiya ay hesho marin-badeed, isaga oo waraysi siinaya Telefishinka dowladda ee EBC:

“Deriskeenna waa inay fikiraan…5000km laga bilaabo cirifka Mesawa ilaa cirifka Muqdisho, ayaa ah halka uu ka jiro khayraad aad u badan, laakin arxan darro & in aysan marin-badeed na siin ma caawin doonto.”

Wuxuu intaas ku daray: “Haddii ay Itoobiya heli waydo badda, kaliya koriimo la’aan kuma dhacayso Itoobiya, laakiin gobolku horumar ma samaynayo, Kaymaha duurjoogto nabad ma ahaan doonaan, ganacsiga adduunkuna khalkhal ayuu geli doonaa.”

Wasiirka gaashaandhiga Israa’iil Israel Katz ayaa uga digay Iran in dalkiisu uu qaadi doono weerarro “xanuun badan oo ka sii daran” kuwii hore haddii aysan oggolaan heshiis laga gaaro wadaxaajoodyada ay la leeyihiin Mareykanka.

“Iiraan waxay ku jirtaa meel taariikhi ah oo go’aan qaadasho ah. Tani waa waqtigoodii ay dooran lahaayeen — mid u dhexeeya buundo u horseedda mustaqbalka ama god go’doon iyo burbur ah,” ayuu yiri.

Wuxuu sheegay in haddii Iiraan doorato waddada labaad, ay “si degdeg ah u ogaan doonto” in bartilmaameedyada aan weli la beegsan ay yihiin kuwo “ka xanuun badan kuwii aan hore u weerarnay.”

“Doorashadu gacantooda ayay ku jirtaa, cawaaqibkuna iyaga ayuu saaran yahay,” ayuu ku soo gabagabeeyay.

Ra’iisul Wasaaraha Pakistan, Shehbaz Sharif, oo ah dhexdhexaadiyaha ugu weyn ee u dhexeeya Maraykanka iyo Iiraan, ayaa maanta gaaray Qatar kadib safar uu ku tegay Sacuudiga, halkaas oo uu kula kulmay Amiirka Qatar, Sheikh Tamim bin Hamad Al Thani.

Sida laga soo xigtay xafiiska ra’iisul wasaaraha Pakistan, Amiirka Qatar ayaa ammaanay doorka Pakistan, waxaana “labada dhinac ay taageereen dadaallada lagu dhimayo xiisadaha iyo xoojinta iskaashiga caalamiga ah si loo hubiyo amniga iyo xasilloonida gobolka, gaar ahaan hubinta in marinnada sahayda tamarta ay si caadi ah u shaqeeyaan.”

Booqashada Shehbaz Sharif ee Saudi Arabia iyo Qatar waxay timid afar maalmood kadib wadaxaajoodyo heer sare ah oo u dhexeeyay wafdiyo ka kala socday Maraykanka iyo Iiraan oo ka dhacay Islamabad.

Waxaa la filayaa inuu u safro Mr Shehbaz dalka Türkiye.

Wadahadalladii ka dhacay Pakistan laguma gaarin heshiis degdeg ah oo si joogto ah u soo afjaraya dagaalka Bariga Dhexe. Si kastaba ha ahaatee, xabbad-joojin ayaa socotay qiyaastii 10 maalmood oo u dhexeysa Iiraan, Maraykanka iyo Israel.

Arbacadii, Amiirka Qatar, Sheikh Tamim bin Hamad Al Thani, ayaa telefoon kula hadlay madaxweynaha Maraykanka, Donald Trump, iyagoo ka wada hadlay saameynta dagaalka ku leeyahay “amniga maraakiibta caalamiga ah iyo xasilloonida suuqyada tamarta iyo silsiladaha sahayda.”

Donald Trump ayaa muujiyay in wareeg labaad oo wadaxaajoodyo nabadeed oo lala yeesho Iiraan laga yaabo inuu toddobaadkan dib uga bilowdo Pakistan.

War-saxaafadeed ay soo saartay Dowladda Puntland ayaa si faahfaahsan uga hadlaya mowqifka ay ka qaadatay xaaladda siyaasadeed iyo dastuuriga ah ee ka taagan Somalia, gaar ahaan khilaafka la xiriira muddo-kordhinta hay’adaha federaalka.

Golaha Xukuumadda Puntland oo shir ku yeeshay magaalada Garoowe 16-kii Abriil 2026, ayaa si qoto dheer uga dooday xaaladda siyaasadeed, amni iyo hannaanka sharciyadda ee dalka. War-saxaafadeedka ayaa lagu sheegay in Puntland ay si cad uga soo horjeedo tallaabo kasta oo ka baxsan dastuurka federaalka, isla markaana ay ku adkeysaneyso ilaalinta nidaamka sharciyadeed ee dalka.

Puntland ayaa si gaar ah u cambaareysay go’aanka Golaha Baarlamaanka Federaalka Soomaaliya ee ku saabsan muddo-kordhinta hay’adaha dowladda federaalka, iyadoo sheegtay in tallaabadaas ay ka hor imaaneyso dastuurka. War-saxaafadeedku wuxuu xusay in Baarlamaanku 14-kii Abriil 2026 uu ansixiyay muddo kordhin, halka sidoo kale muddo xileedka Madaxweynaha la kordhiyay ilaa 15-ka May 2026, arrimahaas oo Puntland u aragto kuwo sharci-darro ah.

Sidoo kale, Puntland waxay ka digtay in hay’adaha federaalka ay wajahayaan xaalad hubanti la’aan dastuur ah, taasoo keeni karta qalalaase siyaasadeed iyo mid amni. Waxay sheegtay in haddii aan si degdeg ah xal loo helin, ay arrintani halis gelin karto xasilloonida dalka iyo wadajirka ummadda Soomaaliyeed.

War-saxaafadeedka ayaa sidoo kale ugu baaqay Madaxweynaha Somalia inuu qaato door hoggaamineed oo mideyn ah, islamarkaana uu qabto shir degdeg ah oo ay isugu yimaadaan dhammaan madaxda dowladda federaalka iyo dowlad-goboleedyada. Puntland waxay aaminsan tahay in wada-hadal iyo is-afgarad siyaasadeed ay yihiin waddada kaliya ee lagu xallin karo khilaafaadka jira.

Ugu dambeyn, Dowladda Puntland ayaa mar kale ku celisay sida ay uga go’an tahay ilaalinta dastuurka, midnimada dalka, iyo xasilloonida, iyadoo ugu baaqday dhammaan dhinacyada inay ka fogaadaan tallaabooyin horseedi kara khilaaf hor leh, isla markaana ay mudnaanta siiyaan danaha guud ee shacabka Soomaaliyeed.

Wargeyska Politico ayaa daabacay warbixin muujinaysa walaac sii kordhaya oo ka dhex jira xisbiga Republican Party, kaas oo uu hoggaamiye muhiim ah ka yahay Donald Trump. Warbixintu waxay tilmaamaysaa in xubno badan oo ka tirsan xisbiga ay ka cabsi qabaan in hadallada iyo hab-dhaqanka Trump ay saameyn taban ku yeeshaan natiijada doorashooyinka dhexe ee Mareykanka.

Doorashooyinkan, oo la qorsheeyay in la qabto 3-da November, ayaa lagu dooranayaa xubnaha labada gole ee Congress-ka Mareykanka, oo kala ah Aqalka Wakiillada iyo Golaha Senate-ka. Xisbiga Jamhuuriga ayaa hadda haysta aqlabiyadda, balse warbixintu waxay muujinaysaa in ay jirto cabsi ah in aqlabiyaddaas lumi karto haddii codbixiyayaashu ka falceliyaan hadallada muranka dhaliyay ee Trump.

Mid ka mid ah xeeldheerayaasha xisbiga ayaa si toos ah ugu sheegay Politico in xaaladdu ay sii adkaanayso marka la gaaro xilliga doorashada. Wuxuu xusay in “qof kasta oo xisbiga ka tirsan uu walaac qabo,” isaga oo si gaar ah u tilmaamay hadallo uu ku sifeeyay kuwo “aan micno lahayn” oo ka soo baxaya Aqalka Cad.

Walaacan ayaa la xiriira cabsi ah in hadalladaas ay ka fogeeyaan codbixiyeyaasha dhexdhexaadka ah iyo kuwa aan si adag ugu xirneyn xisbiga, kuwaas oo door weyn ka ciyaara go’aaminta natiijada doorashooyinka. Khubarada siyaasadda ayaa aaminsan in doorashooyinka dhexe ay inta badan noqdaan mid lagu qiimeeyo waxqabadka hoggaanka talada haya, taasoo sii kordhinaysa culeyska saaran xisbiga.

Dhanka kale, qaar ka mid ah taageerayaasha Donald Trump ayaa weli aaminsan in hadalladiisa tooska ah ay soo jiitaan taageerayaal badan, isla markaana ay xoojiyaan saldhigga taageerada xisbiga. Si kastaba, kala aragti duwanaanshahan gudaha xisbiga ayaa muujinaya in ay jirto khilaaf ku saabsan istiraatiijiyadda ugu habboon ee lagu wajihi karo doorashooyinka.

Ugu dambeyn, warbixinta Politico waxay iftiiminaysaa xaalad siyaasadeed oo adag oo ka dhex jirta xisbiga Jamhuuriga, iyadoo mustaqbalka aqlabiyadooda uu ku xirnaan doono sida ay u maareeyaan saameynta hadallada iyo go’aannada Donald Trump ee ku wajahan doorashada soo socota.

Janaraal Dan Caine, oo ka tirsan hoggaanka isku-dhafka ah ee ciidamada Mareykanka, ayaa ka hadlay arrimaha xabbad-joojinta iyo suurtagalnimada in dagaalku dib u bilaabmo.

Wuxuu farta ku fiiqay amarka xabbad-joojinta ee uu bixiyay Donald Trump, isagoo sheegay in ciidamada Maraykanka ay weli diyaar u yihiin inay dib u bilaabaan dagaal waliba “waqti kasta oo aad u gaaban.”

Dan Caine ayaa sheegay in ciidamada isku dhafka ah ee Maraykanka ay bilaabeen xayiraad badeed Isniintii, 13-ka April.

Wuxuu caddeeyay in tallaabada Maraykanka ay tahay xannibaad lagu hayo dekedaha iyo xeebaha Iran, halkii ay ka ahaan lahayd marinka Hormuz.

Wuxuu sheegay in xannibaaddu ay quseyso dhammaan maraakiibta, iyadoon loo eegayn jinsiyaddooda, kuwa u socda ama ka imanaya dekedaha Iiraan.

“Fulinta xannibaadda waxay ka dhici doontaa gudaha biyaha dhuleed ee Iiraan iyo sidoo kale biyaha caalamiga ah,” ayuu yiri.