Duqeyn cirka ah oo ay si wadajir ah u fuliyeen Mareykanka iyo Israa’iil ayaa lagu beegsaday xarunta kobcinta nukliyeerka ee Natanz ee dalka Iiraan, iyadoo warbaahinta dowladda ay sheegtay in aysan jirin wax daadasho shucaac ah ama khatar ku wajahan dadka ku nool agagaarka.
Weerarro diyaarado aan duuliye lahayn (drones) ah ayaa sababay dab weyn oo ka kacay meel u dhow xarun milatari oo Mareykanku ku leeyahay magaalada Baqdaad ee dalka Ciraaq, taas oo marar badan la weeraray tan iyo markii uu billowday dagaalka Mareykanka iyo Israa’iil ay kula jiraan Iiraan.
Madaxweynaha Mareykanka Donald Trump ayaa sheegay inuusan rabin xabbad-joojin lala gaaro Iiraan. Wuxuu yiri: “Ma sameyso xabbad-joojin marka aad si dhab ah u burburinayso dhinaca kale,” ayuu u sheegay warfidiyeenka.
Weerarrada Mareykanka iyo Israa’iil ayaa weli ka socda Iiraan iyo Lubnaan, xilli malaayiin Muslimiin ah oo ku nool Bariga Dhexe ay u dabaaldegayaan Ciidul-Fidriga, halka Iiraanna ay xusayso munaasabadda sanadka cusub ee Nowruz.
Ra’iisul Wasaaraha Hindiya Narendra Modi ayaa cambaareeyay weerarrada kaabeyaasha Bariga Dhexe, kadib wada hadal uu la yeeshay Madaxweynaha Iiraan Masoud Pezeshkian, isagoo adkeeyay amniga marinnada maraakiibta isla markaana uga mahadceliyay ilaalinta muwaadiniinta Hindiya.
Boqortooyada UK ayaa cambaareysay waxa ay ku tilmaantay weerarro masuuliyad darro ah oo ay Iiraan ku qaaday saldhigga milatari ee Diego Garcia ee Badweynta Hindiya
Wasiirka Arrimaha Dibadda Iran Abbas Araghchi ayaa sheegay in Iiraan ay adeegsan doonto xaqeeda is-difaaca, isagoo uga digay halista ku wajahan muwaadiniinta UK kadib markii Britain u oggolaatay Mareykanka inuu saldhigyadeeda ka weeraro Iiraan.
Weerarkii 70-aad: Ciidamada Iiraan ayaa ku dhawaaqay wajigii 70-aad ee weerarradooda, iyagoo gantaallo iyo diyaarado drone ah u diray Israa’iil iyo saldhigyada Mareykanka ee Khaliijka.