Wareegto qoraal ah oo kasoo baxday xafiiska Mojtaba Khamenei hoggaamiyaha cusub ee Jamhuuriyadda Islaamiga ah ee Iiraan ayaa Mohsen Rezaei loogu magacaabay wakiilka Hoggaamiyaha ee Golaha Sare ee Amniga Qaranka.
Wareegtada ayaa sidoo kale lagu ammaanay “dadaalladii aan kala go’a lahayn ee habeen iyo maalin” ee Mohammad Baqir Zolqadr.
Wareegto kale oo uu soo saaray Mojtaba Khamenei ayaa Mohammad Baqer Zolghadr loogu magacaabay la-taliyihiisa siyaasadda.
Marka laga soo tago Mohsen Rezaei, Saeed Jalili ayaa sidoo kale ah wakiilka Hoggaamiyaha ee Golaha Sare ee Amniga Qaranka.
Sida ku cad Dastuurka Jamhuuriyadda Islaamiga ah ee Iiraan, go’aannada Golaha Sare ee Amniga Qaranka waa in Hoggaamiyuhu ansixiyaa marka la gaaro, waxaana khasab ah in la fuliyo go’aannadaas, waxaana golahaan hogaamiya Madaxweyne Masoud Pezeshkian.
Xubnaha Golaha Sare ee Amniga Qaranka waxaa ka mid ah madaxda saddexda laamood ee dowladda, Taliyaha Guud ee Ciidanka, Taliyaha Guud ee Ilaalada Kacaanka, Taliyaha Guud ee Ciidamada Qalabka Sida, wasiirrada sirdoonka, arrimaha dibadda iyo arrimaha gudaha, iyo madaxa Hay’adda Qorsheynta iyo Miisaaniyadda.
Sidoo kale golaha waxaa ku jira laba wakiil oo uu magacaabo Hoggaamiyaha, midkood wuxuu noqon karaa xoghayaha golaha, iyadoo ay taasi ku xiran tahay wareegtada uu soo saaro Hoggaamiyuhu.
Mojtaba Khamenei ayaa xilka kala wareegay aabbihii kaddib dilkiisa, weli si rasmi ah ugama soo muuqan fagaaraha. Sidoo kale ma uusan jeedin farriin muuqaal ama cod ah, waxaana ilaa hadda la daabacay oo keliya farriimo qoraal ah oo uu magaciisa ku qoran yahay,.
