Ciidanka Dowladda Turkiga ayaa Soomaaliya keenay nidaam raadaar casri ah oo lagu magacaabo ASELSAN EIRS/ALP-300G, kaas oo si rasmi ah loogu rakibay Saldhigga Tababarka Militariga Turkiga ee TURKSOM ee magaalada Muqdisho.
Tallaabadan ayaa qeyb ka ah iskaashiga dhinaca difaaca iyo amniga ee u dhexeeya Soomaaliya iyo Turkiga, kaas oo sanadihii u dambeeyay si weyn u sii xoogeysanayay.
Ujeeddada ugu weyn ee keenista nidaamkan raadaarka ayaa ah in si wadajir ah loo tababaro Ciidanka Qaranka Soomaaliyeed, si ay u helaan aqoon iyo xirfad ku saabsan hawlgalinta raadaarrada, kormeerka hawada, iyo la socodka dhaqdhaqaaqyada hawada sare. Tababarkan oo si toos ah uga socda saldhigga TURKSOM, ayaa diiradda saaraya kor u qaadidda awoodda farsamo iyo midda difaac ee ciidamada Soomaaliyeed.
Saraakiisha tababarka Turkiga ayaa ciidanka Soomaaliyeed ku baraya farsamooyinka casriga ah ee raadaarka, gaar ahaan sida loo aqoonsado loona dabagalo diyaaradaha aan duuliyaha lahayn (drones), diyaaradaha caadiga ah, iyo waliba waxyaabaha kale ee ku socda hawada. Tani waxay muhiim u tahay sugidda amniga hawada iyo ka hortagga khataro iman kara.
Sidoo kale, tababarka waxaa qeyb ka ah isticmaalka simulators casri ah, kuwaas oo u sahlaya askarta Soomaaliyeed in ay ku tababartaan xaalado la mid ah kuwa dhabta ah, iyaga oo aan khatar gelin qalabka ama hawlgalka guud. Waxaa intaas dheer in la siinayo aqoon farsamo oo qoto dheer, si ay u awoodaan dayactirka, hawlgelinta iyo fahamka nidaamyada raadaarka ee mustaqbalka.
Dhanka kale, injineerro Turkish ah ayaa bilaabay qiimeyn iyo daraasad ku saabsan nidaamyada raadaarka rayidka ah ee ka jira Soomaaliya, gaar ahaan kuwa la xiriira duulista rayidka. Ujeeddada arrintan ayaa ah in la horumariyo kormeerka hawada Soomaaliya, lana xoojiyo badqabka duulimaadyada iyo maareynta hawada sare ee dalka.
Guud ahaan, mashruucan ayaa loo arkaa mid xoojinaya madax-bannaanida amni ee Soomaaliya, kanaalinaya dalka inuu yeesho awoodo casri ah oo la jaanqaadaya tiknoolajiyadda difaaca ee caalamka. Waxa kale oo uu muujinayaa doorka sii kordhaya ee Turkiga ee taageerada dhismaha hay’adaha amniga iyo militariga Soomaaliyeed.