Macluumaad cusub oo ay soo gudbiyeen warbaahinta Mareykanka, iyagoo soo xiganaya mas’uuliyiin, ayaa shaaca ka qaaday faahfaahinta hindisaha soo-jeedinta cusub ee Iiraan ee Tehran ay u soo bandhigtay Washington si loo soo afjaro dagaalka, kaas oo maamulka Mareykanku uu weli ka fiirsanayo.
Wargeyska Wall Street Journal oo soo xigtay mas’uuliyiin xog ogaal ah oo sheegaya in soo-jeedinta ugu dambeysay ee Iiraan ay qeexayso qorshe nabadeed oo saddex-marxalad ah. Marxaladda koowaad waxay qeexaysaa in Mareykanka iyo Israa’iil ay joojiyaan dagaalkooda Iiraan, iyagoo bixinaya dammaanad ah in aan dib loo bilaabi doonin mustaqbalka.
Sida laga soo xigtay ilo-wareedyada la hadlay Wall Street Journal, soo-jeedintan, oo uu soo bandhigay Wasiirka Arrimaha Dibadda dowladda iran Abbas Araqchi horraantii toddobaadkan, waxay higsaneysaa in laga gudbo ismari-waaga, colaadda iyo in la hormariyo wadahadallada. Soo-jeedintan, wadahadallada ku saabsan barnaamijka nukliyeerka Iiraan ayaa dib loogu dhigi doonaa marxalad dambe.
Dowladda Iiraan ayaa soo bandhigtay inay joojiso weerarradeeda ka socda Gacanka Hormuz si loogu beddelo in si buuxda loo joojiyo dagaalka iyo in laga qaado xayiraadda Mareykanka ee dekedaha Iiraan.
Sida laga soo xigtay mas’uuliyiintu, Tehran waxay soo jeedisay in dhexdhexaadiyayaashu ay wax ka qabtaan arrinta xiritaanka Marinka Hormuz marxaladda labaad isla markaana ay gacan ka geystaan gaarista heshiis ku saabsan maaraynta marin biyoodka.
Mas’uuliyiinta Iiraan waxay sidoo kale ku wargeliyeen dhexdhexaadiyeyaasha in Tehran ay wali dooneyso inay sii waddo xakamaynta marin biyoodka iyo in marka taas la gaaro, ay bilaabi doonto wadahadallo ku saabsan barnaamijkeeda nukliyeerka iyo arrimo kale, oo ay ku jiraan maalgelinta kooxaha xulafada la ah ee gobolka.
Mawqifka Washington ee Soo jeedinta iran.
Warbixinnada ayaa tilmaamaya in soo jeedinta cusub ee Iiraan aysan si fiican u soo dhaweyn maamulka Mareykanka.
Wargeyska New York Times oo soo xigtay ilo wareedyo sheegaya in Madaxweynaha Mareykanka Donald Trump uu la-taliyayaashiisa u sheegay inuu ku qanacsanayn soo jeedinta Tehran, isagoo soo jeedinaya in aqbalaadda ay Trump ka hor istaagi karto guusha dagaalka.
CNN, oo soo xiganaysa laba ilo wareed ayaa sheegtay in Trump uu aragtidiisa ku aaddan arrinta Iiraan soo bandhigay kulan uu la yeeshay saraakiisha sare ee amniga qaranka ka dib markii uu helay soo jeedinta Iiraan.
Ilo kale ayaa u sheegay CNN in Trump aysan u badnayn inuu aqbalo soo jeedinta Iiraan. Saraakiisha sare ee Mareykanka ayaa aaminsan in dib u furista Marinka Hormuz iyada oo aan wax laga qaban arrinta kobcinta uranium ta iran ka qaadi karto Washington fursad muhiim ah oo ay ku gorgortami karto wadahadallada.
Wakaalada Reuters oo soo xigatay sarkaal Mareykan ah ayaa sheegtay in Madaxweyne Trump uusan ku qanacsanayn soo jeedinta Iiraan sababtoo ah kama hadlayso barnaamijka nukliyeerka Iiraan ayuu yidhi sarkaalkan.
Sidoo kale Sarkaalku wuxuu tilmaamay in Trump uu hore ugala hadlay soo jeedinta la-taliyayaasha sare ee amniga qaranka Mareykanka.
Waxaa xusid mudan in Mareykanku uu xayiraad ku soo rogay dekedaha Iiraan tan iyo Abriil 13 si loogu cadaadiyo Tehran inay sameyso tanaasul, taasoo keentay burburka wadahadalladii labada dhinac.
