Magaalada Tehraan ayaa maanta si rasmi ah uga bilowday munaasabadda qaran ee aaska hoggaamiyihii sare ee Iiraan, Cali Khamenei, kaas oo lagu dilay weerar cirka ah oo ay si wadajir ah u fuliyeen Mareykanka iyo Israa’iil 28-kii Febraayo. Munaasabaddan oo socon doonta ilaa 9-ka Luulyo ayaa loo arkaa dhacdadii ugu weynayd ee taariikhda Iiraan muddo tobannaan sano ah, iyadoo dowladda Iiraan ay ku tilmaantay “astaan qaran oo muujinaysa adkeysiga shacabka iyo dowladda.”
Boqolaal kun oo qof ayaa isugu soo baxay xarunta weyn ee Grand Mosalla ee Tehraan, halkaas oo naxashka Khamenei, oo lagu daboolay calanka Iiraan, la hordhigay shacabka si ay u sagootiyaan. Dadka kasoo qeybgalay ayaa watay calamo, sawirrada hoggaamiyaha geeriyooday, waxayna ku dhawaaqayeen halku-dhegyo ay kaga soo horjeedaan Mareykanka iyo Israa’iil, iyagoo sidoo kale dalbanayay in laga aarguto geeridiisa.
Dowladda Iiraan ayaa sheegtay in aaska dib loo dhigay muddo dhowr bilood ah sababo la xiriiray dagaalkii socday iyo arrimo amni, waxaana ugu dambeyn la bilaabay kadib markii uu dhaqan galay heshiis xabbad-joojin ku meel gaar ah oo dhex maray Iiraan iyo Mareykanka.
Munaasabadda waxaa ka qeybgalay in ka badan 50 wafdi oo rasmi ah oo ka kala yimid dalal badan. Waxaa ka mid ahaa madax iyo masuuliyiin sare oo ka socday Ciraaq, Pakistan, Armenia, Ruushka, Turkiga, Sacuudiga, Hindiya iyo qaar ka mid ah waddamada Khaliijka. Sidoo kale waxaa goobta joogay wakiillo ka socday Xisbullah iyo Xamaas, iyo xubno ka tirsan qoysaska Xasan Nasrallah iyo Camad Mugniyah.
Mid ka mid ah waxyaabaha sida weyn loo hadal hayo ayaa ah muuqashadii ugu horreysay ee taliyaha cusub ee Ciidamada Ilaalada Kacaanka Iiraan (IRGC), Axmad Vahidi, tan iyo markii uu dagaalku billowday. Vahidi ayaa si adag loo ilaalinayay, iyadoo dowladda Iiraan ay ka cabsi qabto isku day kale oo lagu khaarajin karo saraakiisheeda sare.
Dhanka ammaanka, Tehraan waxaa laga hirgeliyay qorshe aad u ballaaran. Dowladda ayaa xirtay inta badan xafiisyada dowladda, waddooyin badan ayaa la xiray, waxaana la kordhiyay adeegyada tareennada, basaska iyo gaadiidka kale ee dadweynaha si loo qaado malaayiinta qof ee la filayo inay kasoo qeyb galaan aaska. Sidoo kale waxaa la diyaariyay goobo waaweyn oo hoy iyo adeegyo caafimaad loogu talagalay dadka safarka dheer uga imanaya gobollada kala duwan.
Sida jadwalku yahay, naxashka Khamenei wuxuu saddex maalmood ku jiri doonaa Tehraan, kadibna waxaa loo qaadi doonaa Qom. Halkaas kadib waxaa la geyn doonaa magaalooyinka barakeysan ee Najaaf iyo Karbala, ugu dambeyntiina waxaa lagu aasi doonaa magaalada Mashhad 9-ka Luulyo, taas oo ah magaalada uu asal ahaan kasoo jeedo Khamenei.
Munaasabaddan ayaa loo arkaa mid saameyn weyn ku leh siyaasadda gudaha Iiraan iyo guud ahaan Bariga Dhexe, maadaama geerida Cali Khamenei ay furtay marxalad cusub oo hoggaamineed, iyadoo indhaha caalamku ay si gaar ah ugu jeedaan sida hoggaanka cusub uu u wajihi doono xiriirka Iiraan iyo reer Galbeedka iyo sidoo kale siyaasadda gobolka.
