Madaxweynaha Jamhuuriyadda Federaalka Soomaaliya ahna Taliyaha Guud ee Ciidamada Qalabka Sida, Dr. Xasan Sheekh Maxamuud, ayaa Qasriga Madaxtooyada Soomaaliya ku qaabilay wafdi sare oo ka socday Ciidanka Cirka Dowladda Pakistan, kaas oo uu hoggaaminayay Taliyaha Difaaca Cirka ahna Taliye Ku-xigeenka Ciidanka Cirka Pakistan, Air Marshal Muhammad Sarfraz.
Kulanka waxaa looga hadlay xoojinta iyo dhismaha Ciidanka Cirka Soomaaliyeed, gaar ahaan tababarka, tayada iyo kordhinta awoodda ciidanka.
Sidoo kale, labada dhinac waxay diiradda saareen xoojinta iskaashiga difaaca Soomaaliya iyo Pakistan, iyadoo kulanku qeyb ka yahay dadaallada lagu horumarinayo awoodda difaaca cirka ee Soomaaliya.
Kulanka ayaa waxaa ka qeyb galay Wasiirka Gaashaandhigga Soomaaliya, Axmed Macallin Fiqi, iyo Taliyaha Ciidanka Xoogga Dalka Soomaaliyeed, Sareeye Guuto Ibrahim Mohamed Mohamud, iyadoo Taliyaha Ciidanka Cirka Soomaaliyeed, Sareeye Guuto Cabdirisaaq Maxamuud Xaaji, oo door muhiim ah ka qaatay kulanka iyo dadaallada lagu dardargelinayo dib-u-dhiska Ciidanka Cirka Soomaaliyeed.
Kulanka ayaa si gaar ah loogu soo qaaday qorshayaasha lagu dardargelinayo dhismaha Ciidanka Cirka Soomaaliyeed, oo ka mid ah hay’adaha muhiimka u ah dhismaha awoodda difaaca qaranka.
Madaxda labada dhinac ayaa ka wada hadlay sidii loo horumarin lahaa awoodda Ciidanka Cirka, tayada iyo xirfadda askarta, iyo sidii loo xoojin lahaa tababarrada iyo aqoonta farsamo ee ciidamada Soomaaliyeed.
Dhismaha awood ciidan oo dhinaca cirka ah ayaa muhiimad gaar ah u leh qorshaha Soomaaliya ee dib-u-dhiska ciidamada qaranka, maadaama awoodda cirka ay door ka qaadan karto ilaalinta hawada dalka, taageerada ciidamada dhulka iyo fulinta hawlgallada amniga marka loo baahdo.
Kulanka Madaxweyne Xasan Sheekh iyo wafdiga Pakistan ayaa sidoo kale muujinaya dadaallada lagu sii xoojinayo xiriirka Soomaaliya iyo Pakistan ee dhinaca difaaca.
Pakistan ayaa muddo dheer lahayd ciidamo leh khibrad dhinaca tababarka iyo hawlgallada milatari, iyadoo Ciidanka Cirka Pakistan uu yahay qayb muhiim ah oo ka mid ah ciidamada qalabka sida ee dalkaasi.
Soomaaliya ayaa dhankeeda ku jirta hannaan dib loogu dhisayo hay’adaha amniga iyo ciidamada qaranka, waxaana iskaashiga dalalka saaxiibka ah uu qayb ka yahay dadaallada lagu doonayo in ciidamada Soomaaliyeed lagu kordhiyo aqoonta, tababarka iyo awoodda farsamo.
