Xubno siyaasadeed oo taabacsan hoggaamiyihii hore ee dowlad-goboleedka Koonfur Galbeed, Cabdicasiis Xasan Maxamed Lafta-gareen, ayaa taageero u muujiyay baaqii iyo mowqifkii uu dhawaan soo saaray Ugaaska beesha Xawaadle, Ugaas Yuusuf Ugaas Xasan Ugaas Khaliif, iyo go’aankii Maxkamadda Sare ee Soomaaliya.
Wasiirkii hore ee Amniga dowlad-goboleedka Koonfur Galbeed, Xasan Cabduqaadir Maxamed, ayaa si cad u shaaciyay inuu garab taagan yahay mowqifka Ugaaska Xawaadle, kaas oo dhawaan baaq u diray bulshada Soomaaliyeed iyo dhinacyada ay khuseyso xiisadda siyaasadeed iyo amni ee ka taagan magaalada Beledweyne, xarunta gobolka Hiiraan.
Xasan Cabduqaadir ayaa sidoo kale taageeray go’aankii ay soo saartay Maxkamadda Sare ee dalka, kaas oo dhaliyay dood siyaasadeed iyo falcelin kala duwan, iyadoo ay arrintan ka aragti duwan yihiin dhinacyo ka tirsan dowladda Federaalka, mucaaradka iyo qeybaha kala duwan ee bulshada Soomaaliyeed.
Mowqifka wasiirkii hore ayaa imanaya xilli ay sii kordhayaan siyaasiyiinta iyo mas’uuliyiintii hore ee dowladda ee ka hadlay xaaladda Beledweyne, gaar ahaan baaqa Ugaaska Xawaadle iyo doorka ay tahay in hay’adaha dowladda iyo dhinacyada siyaasadeed ay ka qaataan dejinta xiisadaha jira.
Taageerada loo muujinayo mowqifka Ugaaska iyo go’aanka Maxkamadda Sare ayaa sidoo kale muujinaysa sida ay arrimahani u yeesheen saameyn siyaasadeed oo ka baxsan magaalada Beledweyne, iyadoo ay sii xoogeysanayaan baaqyada ku aaddan in khilaafaadka jira lagu wajaho hannaan sharci ah, wadahadal iyo xal siyaasadeed.
