Warar ay daabacday warbaahinta caalamiga ah ee FOX NEWS ayaa sheegaya in Mareykanku uu qorsheynayo inuu saldhig militari ka sameysto magaalada Berbera ee Somaliland, oo leh deked istiraatiiji ah oo muhiim u ah ganacsiga iyo amniga gobolka.
Sida wararku tilmaamayaan, saraakiil sare oo ka tirsan ciidamada Mareykanka ee Afrika (AFRICOM), oo uu hoggaaminayo Gen. Dagvin Anderson, ayaa dhowaan booqday goobaha la qorsheynayo in laga hirgeliyo saldhiggaasi. Booqashadan ayaa loo arkaa mid qiimeyn iyo sahamin ah oo ku saabsan muhiimadda juquraafiyeed ee Berbera.
Go’aankan ayaa imanaya xilli ay sii kordhayaan xiisadaha ka taagan marin-biyoodka muhiimka ah ee Hormuz iyo Bab el-Mandeb, kuwaas oo laf-dhabar u ah ganacsiga caalamka. Gaar ahaan, marin-biyoodka Bab el-Mandeb ayaa noqday mid aad muhiim u ah kadib caqabado ka taagan Hormuz, iyadoo qiyaastii 14% ganacsiga badda dunida uu maro halkaas.
Sidoo kale, Sacuudi Carabiya ayaa kordhisay isticmaalka dekedda Yanbu ee Badda Cas, halkaas oo ay u wareejisay dhoofinta saliidda oo gaareysa ilaa 7 milyan oo foosto maalintii, si loo yareeyo khataraha ka iman kara marinada kale.
Dhanka siyaasadda, madaxweyniha Mareykanka Donald Trump ayaa horey u muujiyay in Washington ay ka fiirsaneyso aqoonsiga Somaliland. Si kastaba ha ahaatee, Wasaaradda Arrimaha Dibadda ee Mareykanka ayaa si cad u sheegtay in weli ay taageersan tahay midnimada iyo wadajirka Soomaaliya.
Arrintan ayaa dhalisay dood xasaasi ah oo ku saabsan saameynta ay ku yeelan karto xiriirka gobolka, gaar ahaan mowqifka Dowladda Federaalka Soomaaliya oo si adag uga soo horjeeda tallaabo kasta oo wax u dhimaysa midnimada dalka.
Berbera ayaa hadda noqoneysa meel istiraatiiji ah oo indhaha caalamku ku sii jeedaan, iyadoo la filayo in maalmaha soo socda ay soo baxaan faahfaahin dheeraad ah oo ku saabsan qorshahan.
