Warar soo baxaya ayaa muujinaya in laba xubnood oo ka tirsan Ciidanka Cirka Israa’iil la xiray, kadib markii lagu tuhmay inay basaas u ahaayeen Iran arrin si weyn u gilgishay hay’adaha amniga ee dalkaas.

Sida ay baahisay warbaahinta Israa’iil, gaar ahaan i24 News, xariggan ayaa dhacay Jimcihii, iyadoo lagu saleynayo xog uu bixiyay sarkaal milatari oo aan la magacaabin.

Warbixintu waxay sheegtay in madaxa waaxda baarista dambiyada ee booliska militariga, Lee Ayash, uu xaqiijiyay in labada eedeysane ay ku jireen xabsi ku dhawaad hal bil, xilli ay socdaan baaritaanno qoto dheer oo lagu ogaanayo heerka ay gaarsiisan tahay falka lagu tuhunsan yahay.

Faahfaahin dheeraad ah lagama bixin nooca xogta ay gudbiyeen ama sida xiriirka ay la lahaayeen Iran u dhacay, balse dhacdadan ayaa kusoo beegmeysa xilli xiisad siyaasadeed iyo mid milatari ay ka dhex taagan tahay Israa’iil iyo Iran.

Khubarada amniga ayaa tilmaamaya in haddii eedeymahan la xaqiijiyo, ay noqon karto mid ka mid ah jebinta ugu weyn ee amniga gudaha ee ciidanka Israa’iil sanadihii u dambeeyay.

Dhacdadan ayaa hoosta ka xariiqaysa heerka dagaalka qarsoon ee u dhexeeya Israa’iil iyo Iran dagaal aan mar walba ka dhicin furimaha hore, balse si qoto dheer uga dhex socda hay’adaha sirdoonka iyo gudaha nidaamyada milatari.

Senator Lindsey Graham “Waa in Maraykanka iyo xulafadiisu ay muujiyaan awood ka dhana sheegashada Iiraan ee gacan ku haynta marin biyoodka Hormus.”

“Maamulka Iiraan maaha mid la aamini karo balanqaadyadiisa.”

Sidoo kale Masuul sare oo Maraykan ah ayaa Axios u sheegay haddii aan Wadahadalada horumar degdeg ah laga gaadhin in dagaalku uu maalmo gudahood dib u bilaaban karo.

Madaxweynaha Mareykanka ayaa qabtay kulan wadatashi ammni ah oo ah ku saabsan Iiraan, kadib markii Iiraan ay kordhisey hanjabaadaha ka dhanka ah Mareykanka.

Afayeenka Aqalka Cad, Karoline Leavitt ayaa tidhi “Madaxweyne Trump wuxuu rajo wanaagsan ka qabaa in go’doominta baddeed ee la saaray Iiraan ay fududeyn doonto in la gaadho heshiis nabadeed.”

Si kastaba ha noqotee dadka Mareykanka 85% waxay aaminsanyihiin inuusan Trump ku guuleysan karin dagaalka Iiraan oo 40 maalin oo dagaal khasaare ah uu la galay Iiraan , kaasoo wax natiijo ah aan lagu gaarin, halka keliya 15% ay aaminsanyihiin yoolalka dagaalka inuu gaaray , sida lagu sheegay cod aruurin uu sameeyay wargeyska Politico.

Dhinaca kale Maraykanka ayaa cunaqabatayn saaray shan qof & hey’ado loo haysto in ay calooshood-u-shaqaystayaal Colombian ah galiyeen dalka Suudaan si ay qayb uga noqdaan taageerada Kooxda RSF, sida uu xaqiijiyey La-taliyaha Arrimaha Afrika ee MW Trump.

Dowladda Soomaaliya ayaa marar kala duwan hore u sheegtey in calooshood-u-shaqaystayaasha Suudaan la geeyo la marsiiyey qaybo ka mid ah dalka.

Golaha Sare ee Amniga Qaranka ee Iran (SNSC) ayaa maanta ku dhawaaqay in dalka uu daraasad ku samaynayo “soo-jeedimo cusub” oo ka yimid Mareykanka, isagoo sidoo kale ka digay in wadahadallada Iran aysan wax tanaasul ah u samayn doonin Washington.

War-saxaafadeed uu goluhu soo saaray oo lagu daabacay warbaahinta rasmiga ah ayaa lagu yiri: “Maalmihii u dambeeyay, iyadoo taliyaha ciidanka Pakistan uu ku sugnaa Tehran oo dhexdhexaadin ka ah wadaxaajoodyada, Mareykanku wuxuu soo bandhigay soo-jeedimo cusub, kuwaas oo Jamhuuriyadda Islaamiga ah ee Iran ay hadda daraasad ku hayso, welina jawaab kama bixin.”

War-saxaafadeedka ayaa intaas ku daray in wafdiga wadaxaajoodyada Iran “uusan sameyn doonin wax tanaasul ah, dib u gurasho, ama heshiis dhexdhexaad ah, isla markaana uu si buuxda u difaaci doono danaha shacabka Iran.”

Soo bandhigista soo-jeedimahan cusub ayaa timid saacado kadib markii Iran ay ku dhawaaqday inay dib u xidhay marinka Hormuz, iyadoo jawaab u ah xayiraadda joogtada ah ee Mareykanka ku hayo dekedaheeda. Tani waxay keentay in Madaxweynaha Mareykanka Donald Trump uu uga digto Washington isku day kasta oo “caburin” ah.

Golaha Sare ee Amniga Qaranka ayaa sheegay in “Iran ay go’aansatay inay si buuxda u maamusho oo u kormeerto maraakiibta mara marinka Hormuz ilaa dagaalku gebi ahaanba ka dhammaanayo,” isagoo xusay in xayiraadda Mareykanka ay ka hortagayso xitaa “furitaan xaddidan oo shuruudo ku xiran.”

Tehraan ayaa ugu baaqday Ururka Iskaashiga ee Shanghai inuu cambaareeyo weerarada Israel iyo Mareykanka ee Iran

Jamhuuriyadda Islaamiga ah ee Iran ayaa ugu baaqday Ururka Iskaashiga Shanghai (SCO) inuu cambaareeyo weerarradii dhowaan ay fuliyeen Mareykanka iyo Israa’iil.

Wakaaladda wararka ee rasmiga ah ee IRNA ayaa sheegtay in Mohammad Rasoul Jafari, wakiilka joogtada ah ee Iran u fadhiya SCO, uu codsigan u gudbiyay isagoo ku hadlaya magaca Tehran.

Ururka Iskaashiga Shanghai (SCO) wuxuu leeyahay 10 xubnood oo rasmi ah, kuwaas oo ay ku jiraan Iran, Pakistan, iyo Belarus. Afghanistan iyo Mongolia waa xubno kormeere ah, halka 16 dal—oo ay ka mid yihiin Turkey, Azerbaijan, Masar, Qatar, iyo Imaaraadka Carabta—ay yihiin “la-hawlgalayaal wada-hadal” ee ururka.

Doorka ururkan badanaa waa mid astaan uun ah , balse wuxuu siinayaa hoggaamiyeyaasha fursad ay ku muujiyaan aragtiyahooda iyo dhaliilaha ay wadaagaan.

Warbaahinta USA Today ayaa sheegtay in uu walaac soo food saaray qoysaska ay ka dhasheen askarta Maraykanka ee ku sugan gobolka bariga dhexe gaar ahaanna askarta ka hawl gasha Maraakiibta dagaalka ee dalka Maraykanka kuwaas oo la baahiyey sawirro muujinaya cuntada ay cunaan oo ah mid aad u yar.

Qoysaskan ayaa ku doodaya in askartii ka dhalatay ay wajahayaan cunto yari iyo in aanay haysan gasiin ku filan maaddama oo Saxana la soo sawiray ay muujinayaan in ay cunaan cunto ka yar tii ay hore u heli jireen.

Dagaalka iyo kala go’a sahayda ayaa loo sababeeyey cunto yaraanta askartan ku haysta gobolka bariga dhexe.

Sidoo kale qaybta Af Carabida ee Warbaahinta Al jazeera oo soo xiganaysa dad ku sugan gudaha Maraykanka ayaa sheegtay in walaaca iyo yabaalka haysta waalidinta ciidanku ay tahay mid aad u sarraysa taas oo gaadhey ilaa Wasaaradda Gaashaandhiga ee dalka Maraykanka.

Ciidanka Maraykanka ayaa bariga dhexe ku sugnaa afartii bilood ee la soo dhaafay iyaga oo halkaas u jooga dagaalka ka dhanka ah dawladda Iran.

Wasaaradda Arrimaha Dibadda ee Hindiya ayaa u yeertay safiirka Iran, waxayna muujisay walaac weyn oo ay ka qabto rasaasta lagu furay laba markab oo sita calanka Hindiya kuwaas oo marayay marinka Hormuz.

Wasaaradda Arrimaha Dibadda ee Hindiya ayaa safiirka Iran ka codsatay inuu aragtida dowladdiisa u gudbiyo mas’uuliyiinta Iran, isla markaana dib loo bilaabo sida ugu dhaqsaha badan fududeynta maraakiibta u socda Hindiya inay si nabad ah uga gudbaan marinka Hormuz.

Dhacdadan ayaa timid iyadoo Hindiya tixraacaysay marin amaan ah oo ay Iran horey u siisay dhowr markab oo u socday Hindiya, waxuuna wasiir Misri ugu baaqay Iran inay dib u bilowdo fududeynta maraakiibta u socda Hindiya si ay uga gudbaan marinka si nabad ah.

Xoghayaha Arrimaha Dibadda ee Hindiya, Vikram Misri, ayaa sheegay inuu ka walaacsan yahay dhacdo rasaas ah oo galinkii hore ee Sabtidii uga dhacday laba markab oo sita calanka Hindiya kuwaas oo marayay marinka Hormuz.

Hindiya ayaa sheegtay in Ciidamada Ilaalada Kacaanka (IRGC) ay ku qasbeen laba markab oo Hindi ah oo marayay galbeedka marinka Hormuz ama ay dib u laabtaan.

HNN: Shan qof ayaa la xaqiijiyay inay dhinteen, toban kalena way ku dhaawacmeen kadib dhacdo rasaas lagu furay oo ka dhacday caasimadda Ukraine ee Kyiv, sida uu sheegay madaxweynaha dalkaas Volodymyr Zelenskyj.

– Toban qof ayaa isbitaalka la dhigay iyagoo qaba dhaawacyo iyo jugo, ayuu Zelenskyj ku qoray fariin uu soo dhigay barta X saacadu markay ahayd 17:30.

War cusub oo la soo saaray saacadu markay ahayd 18:09, duqa magaalada Kyiv Vitalij Klitsjko ayaa sheegay in tirada dhimashadu ay korodhay oo gaartay lix qof.

Zelenskyj ayaa sheegay inuu dalbaday in si degdeg ah loo sameeyo baaritaan, isla markaana dhammaan xogta la xaqiijiyay ee kiiskan ay gaarto dadweynaha.

Qofkii looga shakisan yahay falka ayaa la dilay xilli booliisku isku dayayeen inay qabtaan, sida uu sheegay wasiirka arrimaha gudaha Ihor Klymenko.

– Wuxuu dadka ka dhigtay la-haystayaal (hostages) wuxuuna rasaas ku furay booliiska intii lagu guda jiray qabashadiisa, ayuu Klymenko ku sheegay fariin uu ku daabacay Telegram.

Wuxuu sidoo kale sheegay in booliisku isku dayeen inay la hadlaan ninka.

Qofka la tuhunsan yahay ayaa rasaas ka furay degmada Holosijvkyj galabnimadii Sabtida, waxaana ka mid ah carruur dadka dhaawacmay, sida uu hore Telegram ugu sheegay duqa magaalada Vitalij Klitsjko.

Ninka la tuhunsan yahay ayaa rasaas ku furay waddada bannaankeeda, ka hor inta uusan gelin dukaan cunto (supermarket), halkaas oo sidoo kale rasaas laga riday, sida uu sheegay duqa magaalada.

Booliisku waxay ku howlnaayeen sidii ay ninka ugu qaban lahaayeen gudaha supermarket-ka, ayuu yiri.

Heemaal News Network.