Steve McClaren, oo hore uga tirsanaa shaqaalaha tababarka ee Manchester United, ayaa faahfaahin ka bixiyay sababtii khilaafka weyn u dhex maray Cristiano Ronaldo iyo tababarihii hore Erik ten Hag ka hor intii uusan Ronaldo ka tegin kooxda dhammaadkii 2022.
Ronaldo ayaa laga fasaxay United kadib wareysi qarax ahaa oo uu siiyay Piers Morgan, kaas oo uu ku dhaliilay milkiilayaasha kooxda, tababaraha iyo xitaa qaar ka mid ah ciyaartoyda.
Doorka muranka dhaliyay
Ronaldo, oo hore ugu soo ciyaaray Real Madrid, ma uusan aqbalin inuu noqdo ciyaaryahan labaad oo keydka fadhiya nidaamka Ten Hag. Tababaraha reer Holland ayaa doonayay qaab ciyaareed cadaadis badan (pressing) ah — mid uu horay uga hirgeliyay Ajax — taas oo aan waligeed laga dalban Ronaldo inta badan xirfaddiisa.
Arrintan ayaa dhalisay xiriir xumaaday oo ka dhex curtay labadooda.
McClaren ayaa sheegay in Ten Hag si cad ugu sheegay Ronaldo waxa laga rabo:
“Waxa kaliya uu kaa doonayaa waa inaad noqoto ciyaaryahanka ugu horreeya ee cadaadiska bilaaba, samee hal orod, laba orod, xitaa saddex haddii aad awoodo. Haddii aadan sameyn karin ama aadan rabin, ma ciyaari doontid.”
Wuxuu intaas ku daray in Ten Hag uusan diyaar u ahayn inuu tanaasulo:
“Tababarayaal badan way la qabsan lahaayeen xaaladda, laakiin Erik maya. Wuxuu ku adkaystay mabda’iisa. Waxay noqotay is-hor-fadhi (standoff) — yaa guuleysanaya? Erik wuu ku adkaystay go’aankiisa.”
Ronaldo oo mar kale dhaliilay United
Kadib bixitaankiisii iyo ku biiristiisii Al-Nassr ee Sacuudi Carabiya, Ronaldo ayaa mar kale si kulul uga hadlay xaaladda Manchester United, isaga oo ku sheegay in qaabka hadda loo maamulo uusan u oggolaanayn inay ku tartamaan koobabka ugu waaweyn.
Isagoo ka hadlayay barnaamijka Rio Ferdinand Presents, Ronaldo wuxuu yiri:
“Tababaraha Manchester United ma oran karo ‘ma ku tartami karno horyaalka ama Champions League’. Maskax ahaan waa inaad tiraahdaa waan isku dayeynaa. Waa inaad isku daydaa.”
Khilaafkaas ayaa ugu dambeyn sababay in xidhiidhkii Ronaldo iyo United si rasmi ah u soo idlaado, taasoo noqotay mid ka mid ah dhacdooyinkii ugu waaweynaa kubadda cagta sanadkii 2022.